Վարչապետը թանկացած ապրանքների այլընտրանք է առաջարկում

Կառավարությունը քննարկում է դիզվառելիքի գնի փոփոխության հետևանքով գյուղատնտեսության ոլորտում դրա սուբսիդավորման հարցը, այս մասին այսօր ԱԺ հարցուպատասխանի ժամանակ ասաց ՀՀ վարչապետ Կարեն Կարապետյանը:«Ամեն ինչ համեմատության մեջ է, մեր օֆիցիալ գնաճը 2.6 տոկոս է: Գնաճը այսպես հաշվել, թե այնպես, կա բանաձև, որպեսզի չասեք՝ մի ապրանքը թանկացնում եք, մյուսն էժանացնում: Դիզելային վառելիքի ակցիզային հարկը մենք նվազեցրել ենք, կիրառում ենք ավելացված արժեքի հարկ: Դիզվառելիքը հիմնականում օգտագործում են բիզնեսի համար: Բիզնեսը, որն ԱԱՀ է վճարում, դիզելային վառելիքի այս նոր սակագնից շահում է: Միակ տեղը, որտեղ դիզելային վառելիքի նոր սակագինը կարող է բեռ հանդիսանալ` գյուղատնտեսությունն է: Գյուղնախարարությունը հաշվարկ է կատարել, որ եթե նույնիսկ հետագայում ակցիզային հարկի հետևանքով դիզելային վառելիքի տատանումները չլինեն, տարբեր ապրանքատեսակների գինը 1-4 դրամով ավելանալու է, որպեսզի իրենք փոխհատուցեն: Մենք քննարկում ենք տարբերակներ, որպեսզի սուբսիդավորենք` կամ մուտքի վրա, կամ մթերման ժամանակ: Տեսնենք շուկան, ինչպես է արձագանքում դրան», - ասաց Կարեն Կարապետյանը: Անդրադառնալով բենզինի գնին նա նշեց` այն թանկացել է 20 դրամով: Նրա խոսքով՝ բենզին օգտագործողն ունի այլընտրանք՝ թող գազ օգտագործի: «Լավ չէ, որ գազի գինը թանկացել է, լավ կլիներ մնար նույնը, բայց 190-ից 220 գինը նոր մարտահրավեր չէ շուկայում, նախկինում այս գներով աշխատել ենք և էժանացրել ենք այն ժամանակ, երբ այդ հնարավորությունն ունեցել ենք»,- ասաց նա: «Ելք» խմբակցության պատգամավոր  Արարատ Միրզոյանը հակադարձեց վարչապետին, ասելով,  որ թանկացել են այնպիսի առաջնային ապրանքներ, ինչպիսին են՝ կարագը, կարտոֆիլը և այլն։ Կարեն Կարապետյանը նշեց` Հայաստանում գնաճը պաշտոնապես 2,6% է, Վրաստանում` 6,7% Ադրբեջանում`  7,9% :