Փաշինյանը Հայաստանին անվերջանալի ցնցումներ բերած ամենամեծ «պատերազմի կուսակցության» առաջնորդն է. Հայաքվե

Գործող վարչակարգը իշխանության է եկել խաբեությամբ և նպատակաուղղված կերպով քանդում է հայկական պետականությունը՝ փառապանծ եռատոնը վերածելով կորցված տարածքների ու սրբավայրերի համար սգո օրվա։ Այս մասին այսօր՝ մայիսի 9-ին, «Եռաբլուր» զինվորական պանթեոնում լրագրողների հետ զրույցում հայտարարել է «Ուժեղ Հայաստան» կուսակցությանը սատարող «Հայաքվե» նախաձեռնության համակարգող Ավետիք Չալաբյանը։

Նա ընդգծել է, որ մայիսի 9-ը ժողովրդի հիշողության մեջ հավերժ կմնա որպես 1945 թվականին նախնիների ձեռք բերած հաղթանակի և 1992-ին Շուշիի ազատագրողների անօրինակ սխրանքի խորհրդանիշ, չնայած այն բանին, որ ներկայիս իշխանությունները 2020 թվականին այդ քաղաքը «սկուտեղի վրա» մատուցեցին թշնամուն:

Իր ելույթում Չալաբյանը խստորեն քննադատել է Նիկոլ Փաշինյանի այն մեղադրանքները, թե ընդդիմությունը պատկանում է ինչ-որ «պատերազմի կուսակցության»։ «Հայաքվե» նախաձեռնության համակարգողն ընդգծել է, որ հենց Փաշինյանն է իրական «պատերազմի կուսակցության» առաջնորդը։ Ըստ Չալաբյանի՝ դրա ապացույցն այն է, որ նրա կառավարման օրոք հայ ժողովուրդը ստիպված է անդադար կերպով ապրել պատերազմների մեջ (44-օրյա պատերազմից մինչև Հայաստանի ինքնիշխան տարածքի ներխուժում և Արցախի ամբողջական կորուստ)։

«Փաշինյանն ի սկզբանե եկել էր այդ ամեն ինչը հանձնելու և այդ ամեն ինչը պետք է բեմադրեր պատերազմի տեսքով, որպեսզի ինքը պատասխանատվությունը գցեր բանակի և ժողովրդի վրա։ Դու գիտեիր, որ հանձնելու ես և այդ հանձնելու ընթացքում 5000 մարդու գլուխ ես կերել։ Այդ 5000 մարդու արյունը պատասխանատվության է կանչելու», — ընդգծել է Ավետիք Չալաբյանը։

Քաղաքական գործիչը Նիկոլ Փաշինյանին բնորոշեց ոչ միայն որպես «հակապետական երևույթ», այլև մի ուժ, որը փորձում է ջնջել հայկական ինքնության ցանկացած դրսևորում՝ Արցախյան շարժումից ու Հայ Առաքելական Եկեղեցուց մինչև պատմական հիշողությունն ու մշակույթը։

Չալաբյանը քաղաքացիներին հորդորել է տեղի չտալ վարչապետի մանիպուլյացիաներին, հավելելով, որ նրա միակ նպատակն իշխանությունն ամեն գնով ևս մեկ օր պահելն է։ Նա նշել է, որ իշխանությունը պատկանում է ժողովրդին, այլ ոչ թե պաշտոնյային, և ժողովուրդն իրավունք ունի այն վերադարձնել այնպիսի ուժերի, որոնք կծառայեն ազգային շահերին և քայլ առ քայլ չեն զիջի երկրի ինքնիշխանությունը։

Չալաբյանը մատնանշել է իշխանությունների կողմից վարչական ռեսուրսի զանգվածային կիրառումը, ընտրողներին պարգևավճարների ու սոցիալական նպաստների տեսքով կաշառելը, ինչպես նաև ընտրությունների շեմին ակտիվիստների դեմ իրականացվող բռնաճնշումները։ Նրա կարծիքով՝ վարչակարգն իր աթոռից կառչած է մնում պետության դեմ գործած հանցանքների համար անխուսափելի պատասխանատվության վախից դրդված։ Այդուհանդերձ, Ավետիք Չալաբյանը վստահություն է հայտնել, որ չորս շաբաթ անց ազգային ուժերը կկարողանան խաղաղ սահմանադրական ճանապարհով հեռացնել «ապազգայիններին» իշխանությունից և փակել պատմության այս ամոթալի էջը՝ ազգին վերադարձնելով իր հաղթանակները լիարժեք ու հպարտորեն տոնելու իրավունքը։

news.am