Հովհաննես Հարությունյանին հետազոտել են

Սասնա ծռերի խմբից, նրանց աջակցող Հովհաննես Հարությունյանի առողջական վիճակի մասին օրերս ահազանգել էր նրա փաստաբան Հայարփի Սարգսյանը: Վերջինս հայտնել էր, որ 2016-ի հուլիսի 26-ին հրազենային վնասվածք ստանալուց հետո, մինչ օրս Հովհաննեսը նորմալ բժշկական հետազոտություն ու բուժում չի ստացել: Նրա ծնկի ոսկորի մի մասը պոկված է, իսկ մյուս ոսկորներն անկանոն, ոչ ճիշտ սերտաճած, փշրված, ռենտգեն նկարում երևում են նաև մետաղական բեկորները: Այսօր, «Դատապարտյալների հիվանդանոց» ՔԿ հիմնարկ այցելություն են կատարել ՀՀ ՄԻՊ ներկայացուցիչները՝ տեղեկանալու համար Արմեն Բիլյանի, Հովհաննես Հարությունյանի ու Արայիկ Խանդոյանի առողջական վիճակների մասին: ՀՀ ՄԻՊ աշխատակազմի հանրային կապերի բաժնից հայտնում են, որ տեղի է ունեցել առանձնազրույց Հովհաննես Հարությունյանի հետ: Այցի ընթացքում պարզվել է, որ այսօր Հովհաննես Հարությունյանը «Դատապարտյալների հիվանդանոց» քրեակատարողական հիմնարկում ենթարկվել է աջ ծնկան հոդի ռենտգենոգրաֆիկ հետազոտության, ինչպես նաև զննվել է վնասվածքաբանի կողմից: ՄԻՊ աշխատակազմի հանրային կապերի բաժնից նաեւ տեղեկացնում են, որ Սմբատ Բարսեղյանը հացադուլից դուրս գալուց հետո ստացել է սննդակարգի վերաբերյալ համապատասխան խորհրդատվություն: Այդ խորհրդատվությունը տրամադրվել է նաև Պաշտպանի աշխատակազմի ներկայացուցչի կողմից: Ս. Բարսեղյանը ներկայում գտնվում է «Նուբարաշեն» քրեակատարողական հիմնարկի բժշկական սպասարկման բաժնի ստացիոնարում, ինքնազգացողությունը բավարար է: Արայիկ Խանդոյանի հետ առանձնազրույցի ընթացքում նրան տրվել է անհրաժեշտ իրավական խորհրդատվություն՝ կապված քրեակատարողական հիմնարկ փաստաբանի մուտքին առնչվող օրենսդրական կարգավորումների հետ: Ա. Խանդոյանը գտնվում է «Նուբարաշեն» քրեակատարողական հիմնարկի բժշկական սպասարկման բաժնի ստացիոնարում: