Ձեր անունն էլ տամ՝ 5 րոպեից կհայտնվեք КГБ-ի պադվալում. Սամվել Կարապետյանի պատասխանը՝ լրագրողին (video)

«Ուժեղ Հայաստան» կուսակցության վարչապետի թեկնածու, գործարար և բարերար Սամվել Կարապետյանը մայիսի 7-ին կայացած մամուլի ասուլիսի ժամանակ պարզաբանել է, թե ինչու է 2021 թվականին հանդիպել վարչապետ Նիկոլ Փաշինյանի հետ և սեղմել նրա ձեռքը։

Նա հաստատել է, որ հանդիպել է Փաշինյանի հետ, սակայն հերքել է լրագրողի շնորհավորանքի վարկածը։ «Ինչ վերաբերում է շնորհավորանքին՝ նման բան չի եղել։ Իսկ հանդիպման մասով՝ այո՛, հանդիպել եմ և փորձել եմ խելքի բերել։ Երբ դու երկրի խոշորագույն ընկերությունների սեփականատերն ես, և նույնիսկ նման անհաջող կառավարիչն է ցանկանում հանդիպել քեզ հետ, մերժելը սիրուն չէ։ Ես հարգում էի ինստիտուտը, այլ ոչ թե այն մարդուն, ում հետ հանդիպում էի», - պարզաբանել է Կարապետյանը։

Այն հարցին, թե ինչու էր այդ ժամանակ անտեսում փողոցային պայքարի մասնակիցներին, քաղաքական գործիչը խորհուրդ է տվել ցույցերի ղեկավարներից ճշտել իր մասնակցության չափը. «Ենթադրում եմ՝ այն ամենամեծն է եղել։ Բայց ես դա անում էի հանգիստ և ոչ հրապարակային»։

Ապագա նախագահի, ԱԱԾ պետի և գլխավոր դատախազի անունները հայտնելու, ինչպես նաև նախագահի պաշտոնում արքեպիսկոպոս Աջապահյանի թեկնածությունը դիտարկելու խնդրանքին ի պատասխան՝ Կարապետյանը հրաժարվել է անուններ տալ՝ նշելով, որ ցանկացած ոք, ում անունը հնչեցվի, 5 րոպե անց կհայտնվի «ԿԳԲ-ի պադվալներում»։ Քաղաքական գործչի խոսքով՝ բոլոր թեկնածությունները կան։ Ինչ վերաբերում է արքեպիսկոպոսին, ապա թեև նա հարգված մարդ է և համապատասխանում է բոլոր չափանիշներին, այդուհանդերձ հոգևորական է և «կապված է իր աշխարհի հետ»։