Ավտովթար Վայոց Ձորում. վիրավորներից մեկը զինծառայող է

Այսօր` մարտի 3-ին, ավտովթար է տեղի ունեցել Վայոց Ձորի մարզում: Ժամը 01:00-ի սահմաններում Եղեգնաձոր քաղաքի բնակիչ, 27-ամյա Սամվել Հայրապետյանը Գետափ-Մարտուի ավտոճանապարհի 2-րդ կմ հատվածում` դեպի Գետափ գյուղ ընթանալիս, իր վարած ВАЗ 2121 մակնիշի 87 MO 777 համարանիշի ավտոմեքենայով դուրս է եկել ճանապարհի հանդիպակաց երթևեկելի գոտի, բախվել բետոնե արգելապատնեշին ու կողաշրջվել: Ինչպես հայտնում է ֆոտոլրագորղ Գագիկ Շամշյանը, վթարի հետևանքով վարորդ Ս. Հայրապետյանն ու ուղևոր, Գետափ գյուղի բնակիչ, 24-ամյա Վան Սարդարյանը մարմնական վնասվածքներով տեղափոխվել են Եղեգնաձորի բժշկական կենտրոն: Ֆոտոլրագրողի տեղեկություններով` Վ. Սարդարյանը պայմանագրային զինծառայող է: