«Հրապարակ». Ժաննա Անդրեասյանը մեր երկիրը չի սիրում, նա մեր երկրի թշնամին է

  «Հրապարակ օրաթերթ»-ը գրում է. ԿԳՄՍ նախարար Ժաննա Անդրեասյանն իր համար անցանկալի կադրերին ինչ-ինչ պատճառներով ազատում է աշխատանքից: 2025 թվականին նա աշխատանքից անհիմն ազատել է Սպիտակի պետական քոլեջի տնօրենի տեղակալ Հեղինե Պողոսյանին: Պողոսյանը դիմել է դատարան՝ նախկին աշխատանքում /պաշտոնում վերականգնվելու եւ հարկադիր պարապուրդի ամբողջ ժամանակահատվածի համար միջին աշխատավարձը՝ 06.09.2025 թվականից մինչեւ դատարանի վճռի օրինական ուժի մեջ մտնելը բռնագանձելու, իսկ նախկին աշխատանքում/պաշտոնում վերականգնվելու անհնարինության դեպքում՝ հարկադիր պարապուրդի ամբողջ ժամանակահատվածի համար հատուցում ստանալու պահանջով:

Դատարանը հայցը բավարարել է՝ անվավեր է ճանաչել կրթության, գիտության, մշակույթի եւ սպորտի նախարարի 05․09․2025 թվականի «Սպիտակի պետական քոլեջ» պետական ոչ առեւտրային կազմակերպության տնօրենի տեղակալ Հեղինե Պողոսյանի լիազորությունները դադարեցնելու եւ պայմանագիրը լուծելու մասին հրամանը: Որոշել է պարտադրել ԿԳՄՍՆ-ին` Հեղինե Պողոսյանին վերականգնել նախկին աշխատանքում, 06.09.2025 թվականից բռնագանձել հարկադիր պարապուրդի ամբողջ ժամանակահատվածի համար միջին աշխատավարձը:

Գորիսի պետական քոլեջի նախկին տնօրեն Կարեն Լազարյանի հայցը՝ ընդդեմ Ժաննա Անդրեասյանի, դատարանը եւս բավարարել է, որոշել է պարտադրել ԿԳՄՍՆ-ին՝ Կարեն Լազարյանին նախկին աշխատանքում վերականգնել, վերականգնելու անհնարինության դեպքում վերջինիս օգտին պատասխանողից գանձել նրա միջին աշխատավարձի 12-ապատիկի չափով հատուցման գումար:
Կարեն Լազարյանը մեզ հետ զրույցում ասաց, որ նախարարի հրամանը եղել է ապօրինի, դատարանը բավարարել է իր հայցը. «Հանուն իրենց սրտի թեկնածուի, Ժաննան գնացել է այդ քայլին: Ժաննան հաշվարկել է, լավ էլ իմացել է, որ եթե մենք գնանք դատարան, հաստատ դատը շահելու ենք, բայց խնդիրն այստեղ այլ է․ այժմ այդ քոլեջը չկա, լուծարվել է: Ժաննան մտածել է՝ կգնան դատարան, մեկ է՝ այդ քոլեջն էլ չկա, դրամական փոխհատուցումները կանենք, ու գործը կփակվի: Նախարար կոչվածը գնացել է ապօրինի գործողության: Նա երկրի թշնամիներից է, Ժաննա Անդրեասյանը մեր երկիրը չի ընդունում, չի սիրում, Ժաննա Անդրեասյանն ի՞նչ կապ ունի, վերջիվերջո, այս երկրի հետ: Նա ոչ միայն օրենքներ է խախտում, այլեւ մեկ ուրիշ դատական գործում նույնիսկ իրավական փաստաթղթեր է կեղծում: Ժաննա Անդրեասյանն օտար է այս պետությանը, այս երկրին: Նա ընդամենը պարգեւավճար ստացող է: Ժաննան շուտով չի լինելու, բայց չգիտի, որ բազմաթիվ հայցեր կան իր նկատմամբ, մարդիկ չեն մոռանալու, մինչեւ վերջ գնալու են: Նա օտար է հայ ազգի համար, նա իր ժուլիկ դեմքով մեր օրենքները պղծում է, կեղծում է, եւ դա միայն կանեն օտարները: Քեզ նախարար են նշանակել, որ կառավարես ոլորտը, ոչ թե պղծես ու կեղծես օրենքները»: