Շոշափելի «վայրիվերումներ» խոշոր հարկատուների ցանկում. «Փաստ»

 «Փաստ» օրաթերթը գրում է.

Հետաքրքիր «իրադարձություններ» են տեղի ունենում Հայաստանի 1000 խոշոր հարկատուների ցանկում: Եթե դիտարկելու լինենք խոշորների մեջ ամենախոշորների հիսնյակը, ապա հատկապես այստեղ կան էական «վայրիվերումներ»:

 Մինչ դրանց անդրադառնալը, սակայն, նշենք, որ 2025 թ. հունվար-մարտ ամիսների հարկատուների ցանկում դարձյալ տոկոսային հարաբերությամբ գերակշռում են ներմուծող ու առևտրով զբաղվող կազմակերպությունները. նրանց թիվը 14-ն է: Հաջորդը բանկերն են. եթե 2025 թ. տարեկան ցուցանիշներով հիսնյակում 8 բանկ էր, ապա այս տարվա առաջին եռամսյակի ցուցանիշներով՝ 6 («Ամերիաբանկ», «Արդշինբանկ», «Ակբա» բանկ, «Էվոկա» բանկ, «Ինեկոբանկ», «Ֆասթ» բանկ): Այ, այստեղ արդեն գործ ունենք հիմնական տեղաշարժերից մեկի հետ: Հիսնյակում է հայտնվել «Ֆասթ» բանկը՝ արձանագրելով ամենամեծ «թռիչքներից» մեկը. եթե 2025 թ. առաջին եռամսյակում այս բանկը 93-րդն էր, իսկ 2025 թ. տարեկան ցուցանիշներով 75-րդը, ապա այս անգամ արդեն այն 48-րդ տեղում է:

Քանակական առումով նվազում կա նաև արտադրողների ցանկում (ինչպես միշտ, հանքարդյունաբերությունը հաշվարկում ենք առանձին): Եթե 2025 թ. տարեկան արդյունքներով լավագույն հիսնյակում գոնե 10 արտադրող կար, ապա այս տարվա առաջին եռամսյակում նրանց թիվը 7-ն է: Այստեղ էլ ուշագրավ է «Ջերմուկ գրուպի» կտրուկ անկումը. այս ընկերությունը 2025 թ. առաջին եռամսյակում 15-րդն էր, 2025 թ. տարեկան ցուցանիշներով 36-րդն էր, իսկ հիմա արդեն մեկ տարվա ընթացքում փաստացի իջել է 80 հորիզոնականով և հայտնվել 95րդ տեղում:

Ինչ վերաբերում է կոնկրետ սննդամթերքի արդյունաբերությանը, ապա հիսնյակում երկու ընկերություն է, իսկ եթե հաշվի ենք առնում նաև ջրեղենի և խմիչքների արտադրությունը, ապա՝ երեք:

Այս տարվա առաջին եռամսյակի տվյալներով Հայաստանի սննդի արդյունաբերության ընդգծված առաջատարը «Աթենք» մսամթերքի գործարանն է, որը տարիներ շարունակ եղել է իր ոլորտի առաջատարը, իսկ հիմա փաստացի նաև գլխավորում է ընդհանրապես սննդամթերքի արդյունաբերության ցանկը: «Աթենքը» 1000 խոշոր հարկատուների ցանկում 27-րդն է: 34-րդ հորիզոնականում «Կոկա Կոլա ՀԲՔ Արմենիա» ընկերությունն է, 43-րդ հորիզոնականում՝ «Գրանդ Քենդին», որոնք ևս մշտապես խոշոր հարկատուների լավագույն հիսնյակում են լինում: Ի դեպ, հավելենք, որ 50 խոշոր հարկատուների մեջ ծխախոտի արտադրությամբ զբաղվող միանգամից 3 ընկերություն կա:

Ինչ վերաբերում է հանքարդյունաբերությանը, ինչի մասին նշեցինք վերևում, ապա այս ոլորտի հինգ կազմակերպություն է լավագույն հիսնյակում: Այստեղ էլ, ինչպես միշտ, ընդգծված առաջատարը «Զանգեզուրի պղնձամոլիբդենային կոմբինատն» է, որը նաև Հայաստանի տնտեսության հիմնական հենասյուներից մեկն է և մշտապես լավագույն եռյակում է:

Հավելենք նաև, որ հիսնյակում են, այսպես կոչված, «կոմունալ» ոլորտի ընկերությունները («Գազպրոմ Արմենիա, ՀԷՑ, «Վեոլիա ջուր»), ինչպես նաև կապի օպերատորները («Վիվա Արմենիա», «Յուքոմ», «Տելեկոմ Արմենիա»): Հիսնյակը եզրափակում է «Դոմուս» ընկերությունը, որը խոշոր հարկատուների առաջին հիսնյակում է եղել նաև անցած տարվա նույն ժամանակահատվածի արդյունքներով:

Մանրամասները՝ «Փաստ» օրաթերթի այսօրվա համարում