Ինչպես է ազդելու սեղմված գազի թանկացումը տրանսպորտի գնի վրա

Այսօր Ազգային ժողովում քննարկվում է «Ավտոմոբիլային տրանսպորտի մասին» Հայաստանի Հանրապետության օրենքում փոփոխություններ կատարելու մասին օրենքի նախագիծը: Նախագծի հիմնական զեկուցող, ՀՀ տրանսպորտի, կապի և տեղեկատվական տեխնոլոգիաների նախարարի առաջին տեղակալ Գագիկ Գրիգորյանից ԱԺ փոխնախագահ Միքայել Մելքումյանը հետաքրքրվեց, թե ինչպես է ազդելու սեղմված գազի թանկացումը տրանսպորտի գնի վրա։ Գագիկ Գրիգորյանն էլ նշեց, որ թանկացումները նոր են ու նախարարությունը դեռևս չունի հստակ պատասխան, ընթանում են քննարկումներ։ «Ուսումնասիրություններ ենք անցկացնում։ Գների վրա դրա ազդեցության չափը կախված կլինի նրանից, թե մինչև հիմա գործող գները ինչքանո՞վ են վերադարձնում ներդրողի կամ փոխադրողի ծախսերը։ Եթե դրանք զրոյի մակարդակում են գտնվում, ապա գները կունենան բարձրանալու տենդենց, եթե ոչ, ապա նման տենդենց չի լինի», - նշեց փոխնախարարը։ Փոխնախարարը նշեց, որ այս մասով այսօր մի քանի խոշոր փոխադրողների հետ նախարարությունը քննարկում է կազմակերպել։