«Հրապարակ»․ Սահմանամերձ Բերդը «Հայփոստին» բարեգործություն է արել

 «Հրապարակը» գրում է. Ապրիլի 16-ին, հիմք ընդունելով «Հայփոստ» ՓԲԸ-ի թիվ 2113/Մ/25 դիմումը եւ հաշվի առնելով Բերդ համայնքի ղեկավար Աստղիկ Հակոբյանի առաջարկությունը՝ Բերդ համայնքի ավագանին քվեարկությամբ որոշել է համաձայնություն տալ Բերդ համայնքի սեփականությունը հանդիսացող, Բերդի Պառավաքար գյուղի 12 փողոց, 4 շենք հասցեում գտնվող վարչական շենքի երկրորդ հարկի N 12 սենյակը՝ 5.67 քմ մակերեսով, N 13 սենյակը՝ 12.13 քմ մակերեսով, ընդհանուր՝ 17.8 քմ մակերեսով, անհատույց օգտագործման իրավունքով, 5 տարի ժամկետով տրամադրելու «Հայփոստ» ՓԲԸ-ին՝ փոստային ծառայություններ իրականացնելու նպատակով: Այդ որոշմանը կողմ է քվեարկել ավագանու 13 անդամ, դեմ՝ 2, ձեռնպահ՝ 3։

Բերդի համայնքապետարանից տեղեկացա, որ մոտ մեկ տարի առաջ «Հայփոստ» ՓԲԸ-ի տնօրենը, լինելով Բերդի համայնքապետարանում, հայտնել է, որ իրենց ընկերությունը ֆինանսական վատ վիճակում է` աշխատավարձերը չեն կարողանում ժամանակին վճարել, կենսաթոշակները նախկինում «Հայփոստ» -ի միջոցով էին վճարվում, հիմա՝ բանկային քարտերով, եւ այդ պատճառով իրենց եկամուտները նվազել են, ուստի խնդրել է «Հայփոստի» տարածքն անվճար հիմունքներով տրամադրել իրենց։

Իսկ իրականությունն այն է, որ «Հայփոստ»-ը Հայաստանի տարածքում եւ արտերկրի հետ փոստային ծառայությունների մենաշնորհ ունի, ընկերության ղեկավար կազմն էլ շատ բարձր աշխատավարձեր է ստանում, օրինակ՝ «Հայփոստ»-ի տնօրենը` Հայկ Կոնջորյանի կինը, ամսական 10 միլիոն դրամ աշխատավարձ է ստանում։ Սակայն Բերդ համայնքի սահմանամերձ Պառավաքար գյուղում փոստային բաժանմունքի համար 2 սենյակի վարձակալության փոքր գումարը չեն կարողանում վճարել` խնդրել են տարածքն անվճար տրամադրել։