Խոստովանում են` Մոսկվա-Անկարա առճակատման վտանգը մեծ է

Ռուսաստանի և Թուրքիայի միջև հարաբերությունների սրվածությունն արդեն սպառնում է վերածվել ավելի վտանգավոր լարվածության: Սա չի բացառում արդեն արևմուտքը: Մոսկվան ու Անկարան շարունակում են միմյանց մեղադրել` սիրիական խնդրի համատեքստում, բայց այդ մեղադրանքները գնալով ավելի են մոտենում առճակատման այլ մակարդակի... Թուրքիայից հումանիտար օգնության ավտոշարասյուներով զենք է տարվում Սիրիայի զինյալներին, հայտարարել Է Ռուսաստանի արտաքին գործերի նախարար Սերգեյ Լավրովը՝ Ժնևում ելույթ ունենալով ՄԱԿ-ի Մարդու իրավունքների խորհրդի բարձր մակարդակով հանդիպման շրջանակներում: «Առանձնահատուկ խնդիր է՝ կասեցնել ահաբեկիչների սնուցումը դրսից, ինչի համար անհրաժեշտ Է փակել Թուրքիայի հետ Սիրիայի սահմանը, որով զենք է մատակարարվում ելուզակներին, այդ թվում՝ հումանիտար օգնության ավտոշարասյուներով»,-ընդգծել է նա` ուշադրություն է հրավիրելով այն բանի վրա, որ այդ տեղեկատվությունը հրապարակելու թուրք լրագրողների փորձերը հետապնդվում են Անկարայի կողմից: «Այդ մասին հայտնող լրագրողներին դատի են տալիս և դատապարտում երկար տարիների բանտարկության»,-նշել է ՌԴ ԱԳ նախարարը։ Իսկ Թուրքիայի վարչապետ Ահմեթ Դավութօղլուն դատապարտել է Սիրիայում Ռուսաստանի գործողությունները: «Մոսկվան, (Բաշար Ասադի) ռեժիմը, PKK-ն («Քրդստանի աշխատավորական» կուսակցություն) ու YPG-ը (Սիրիայի քրդերի ուժեր) գործում են միմյանց հետ համագործակցած։ Նրանք մտադիր են Թուրքիայի հարավային սահմաններին ահաբեկչական կազմավորում ստեղծել։ Թուրքիան հասկանում է տեղի ունեցող դեպքերի իմաստն ու ձեռնարկելու է հակամիջոցներ։ Մենք կպաշտպանենք մեր երկրի ազգային անվտանգությունը՝ առանց գեթ մեկ վայրկյան կասկածելու»,- ասել է նա։ Ռուսաստանի և Թուրքիայի միջև դիմակայության ռիսկը մնում է շոշափելի, հայտարարել է Եվրոպայում ՆԱՏՕ-ի միացյալ զինված ուժերի գլխավոր հրամանատար ամերիկացի գեներալ Ֆիլիպ Բրիդլավը, ով նաև ղեկավարում է ԱՄՆ-ի զինված ուժերի եվրոպական հրամանատարությունը: «Սիրիայում հետաքրքրությունների լուրջ տարաձայնությունները հանգեցրել են Թուրքիայի և Ռուսաստանի հարաբերությունների բարդացման: Եվ տվյալ դեպքում թյուրիմացության և նույնիսկ առճակատման սպառնալիքը մնում է լուրջ»,- ասել է գեներալ Բրիդլավը ամերիկյան սենատում լսումների ժամանակ: Ի դեպ, առկա վտանգի հետ մեկտեղ, թեև ԱՄՆ-ը որոշ հարցերում քննադատում է Թուրքիայի կողմից Մերձավոր արևելքում տարվող քաղաքականությունը, այնուամենայնիվ նաև շարունակում է աջակցել: Պենտագոնը 683 մլն դոլարի պայմանագիր է կնքել ամերիկյան երկու ընկերությունների հետ` կառավարվող BLU-109 ավիառումբեր ստեղծելու և դրանք Թուրքիայի զինված ուժերին մատակարարելու նպատակով: «Պենտագոնը 682.9 մլն դոլարի պայմանագիր է ստորագրել, Թուրքիա չնշված քանակությամբ կառավարվող ավիառումբեր մատակարարելու համար: Համաձայնագիրը կնքված է ժամանակին, քանի որ մենք ակտիվ մասնակցություն ենք ունենում ասիմետրիկ մարտական գործողություններում և կառավարվող ռումբերի կարիք ունենք»,- ասել է Թուրքիայի պաշտպանության նախարարության ներկայացուցիչը: Հակաբունկերային BLU-109 ռումբերի և նրանց բաղադրիչների վաճառքի համար պայմանագիր է կնքել ամերիկյան Ellwood National Forge և General Dynamics Ordnance and Tactical Systems ընկերությունների հետ: Իսկ ԱՄՆ-ի մեկ այլ դաշնակից` Սաուդյան Արաբիայի զինված ուժերի ինքնաթիռները պատրաստ են ԴԱԻՇ-ի դիրքերին հարվածել՝ ռազմական թռիչքներ իրականացնելով Թուրքիայի տարածքում գտնվող «Ինջիրլիքի» ավիաբազայից։ Այս մասին հայտարարել է թագավորության պաշտպանության նախարարության խորհրդական, գեներալ Ահմեդ Ասիրին: «Ներկա դրությամբ թագավորության ռազմաօդային ուժերը պատրաստ են ԴԱԻՇ-ի դիրքերի վրա օդային հարձակումներ կատարել «Ինջիրլիքի» թուրքական ռազմաբազայից»,- ասել է նա՝ հավելելով, որ մինչ այժմ «Ինջիրլիքի» ավիաբազայում գտնվող սաուդյան կործանիչները չեն մասնակցել ԴԱԻՇ-ի դեմ որևէ գործողության։ Ավելի վաղ հայտնի էր դարձել, որ «Ինջիրլիք» են ժամանել Սաուդյան Արաբիայի ռազմաօդային ուժերի F-15 տիպի 4 կործանիչներ, որոնց թռիչքի հեռահարությունը կազմում է մինչև 5500 կիլոմետր։ Տպավորություն է, որ բոլորը պատրաստվում են ավելի վտանգավոր մի փուլի, որում Թուրքիան ու Ռուսաստանն արդեն ուղիղ դուրս կգան միմյանց դեմ... Մետաքսյա Շալունց