Ովքեր կփոխարինեն Ալի Խամենեիին

«Ազատություն» ռադիոկայանի պարսկական ծառայության փոխանցմամբ՝ հայտնի են դարձել Իրանի գերագույն ղեկավարի պաշտոնին հավակնողների անունները։ Փորձագետները պնդում են, որ Իրանի ներկայիս առաջնորդ 76-ամյա Ալի Խամենեիի առողջական վիճակը նրան կհարկադրի լքել զբաղեցրած պաշտոնը և այն զիջել ուրիշներին։ Արտերկրում բնակվող իրանցի լրագրող Գոլնազ Էսֆանդիարին նշել է, թե ովքեր կարող են հավակնել այդ պաշտոնին։ Նրանցից մեկը երկրի դատական իշխանության ղեկավար Մահմուդ Շահրուդին է, ով պահպանողական քաղաքական գործիչ է և հանդես է եկել դատական մի շարք բարեփոխումներով։ Մեկ այլ հավանական թեկնածու է համարվում 82-ամյա Հաշեմի Ռաֆսանջանին՝ Իրանի նախկին նախագահը և երկրի ամենահարուստ մարդկանցից մեկը։ Ռաֆսանջանին մորուքի բացակայության պատճառով ստացել է «Շնաձուկ» մականունը։ 2013 թվականի նախագահական ընտրություններում նա աջակցել է Հասան Ռոհանիին և համարվում է ռեֆորմիստների քաղաքականությանը մոտ կանգնած անձ։ Իրանցի լրագրողը կարծում է, որ Հասան Ռոհանին նույնպես կարող է համարվել Ալի Խամենեիի հավանական փոխարինող՝ հաշվի առնելով նրա աճող հեղինակությունը, ինչը կապված է Իրանի հանդեպ սահմանված արևմտյան պատժամիջոցների վերացման հետ։ Իրանի գերագույն ղեկավարի պաշտոնին կարող են հավակնել նաև իրանցի առաջնորդների ազգականները՝ իր ռեֆորմիստական հայացքներով հայտնի Հասան Խոմեյնին, ով Իրանի Իսլամական Հանրապետության հիմնադիր Ռուհոլլահ Խոմեյնիի թոռն է, իր պահպանողական հայացքներով հայտնի Մոջթաբ Խամենեին՝ ներկայիս ղեկավարի որդին, և Իրանի խորհրդարանի նախագահ Ալի Լարիջանիի եղբայր Սադեգ Լարիջանին։