Դավիթ Մինասյանի կալանավորման դեմ բողոքը կքննի դատավոր Ադրինե Ղուկասյանը

Սուրբ Աննա եկեղեցում Նիկոլ Փաշինյանի մասնակցությամբ միջադեպի գործով 18-ամյա Դավիթ Մինասյանին կալանավորելու որոշման դեմ բողոքը կքննի Վերաքննիչ քրեական դատարանի դատավոր Ադրինե Ղուկասյանը, դատարանը վարույթ է ընդունել բողոքը։ Այս մասին «Փաստինֆո»-ի հետ զրույցում հայտնեց փաստաբան Լուսինե Մարտիրոսյանը։

Ինչպես արդեն տեղեկացրել ենք՝ Երևանի ընդհանուր իրավասության քրեական դատարանը՝ դատավոր Մնացական Մարտիրոսյանի նախագահությամբ, բավարարել է 18-ամյա դպրոցական Դավիթ Մինասյանին կալանավորելու միջնորդությունը։ Դատարանի որոշման դեմ բողոք ներկայացվել է երեկ, ինչի մասին տեղեկացրել ենք։ Գործը, սակայն, դեռևս առաջին ատյանի դատարանը չի ուղարկել Վերաքննիչ դատարան, որը 10-օրյա ժամկետում պետք է որոշում կայացնի։

Պաշտպան Լուսինե Մարտիրոսյանը լիահույս է, որ դատարանը, հաշվի առնելով բացառիկ իրավիճակը, որ 18 տարեկան է, առողջական խնդիրներ ունի, գոնե շտապ կքննարկի բողոքը։ Վերաքննիչ բողոքի բովանդակությունից պաշտպանը չմանրամասնեց՝ պայմանավորված նախաքննության գաղտնիությամբ, սակայն նշեց, որ պահանջում են վերացնել խափանման միջոց կալանքը կամ կիրառել այլընտրանքային խափանմնա միջոց։ Մարտիրոսյանի խոսքով՝ շատ կցանկանար, որ Մայրության տոնին գոնե մարդասիրությունը գործեր, մայրն այսօր կարողանար տեսնել Դավիթին, քանի որ տոտալ սահմանափակումներ կան տեսակցությունների։ Անդրադառնալով առողջական վիճակին՝ Մարտիրոսյանը տեղեկացրեց, որ այսօր առավոտյան է այցելել Դավիթին, վիճակը նույնն է։

Հիշեցնենք, որ Սուրբ Աննա եկեղեցում մարտի 29-ին Փաշինյանի մասնակցությամբ միջադեպ է եղել, Փաշինյանի թիկնապահները նախ երիտասարդին քաշելով ճանապարհ են բացել, իսկ երբ երիտասարդը նշել է, որ ցանկացել է իր տեղում կանգնած մնալ՝ վեճ է եղել։ Ավելի ուշ ոստիկանները ուժի կիրառմամբ եկեղեցուց բերման ենթարկեցին երիտասարդներին։ Միջադեպի առթիվ նախաձեռնվել է քրեական վարույթ՝ Քրեական օրենսգրքի 297-րդ հոդվածի 1-ին մասով (խուլիգանությունը) և 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը)։ Ձերբակալվածները եղել են Դավիթ ու Միքայել Մինասյանները, ովքեր սովորում են դպրոցում, ու հանրային գործիչ Գևորգ Գևորգյանը։ ՔԿ-ն նրանց մեղադրանք ներկայացրեց, Միքայել Մինասյանին՝ 46-297-րդ հոդվածի 1-ին մասով (խուլիգանությանն աջակցելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելուն աջակցելը), Գևորգ Գևորգյանին՝ 46-297-րդ հոդվածի 1-ին մասով (խուլիգանությունը կազմակերպելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը կազմակերպելը)։ Վերջիններիս նկատմամբ որպես խափանման միջոց է կիրառվել բացակայելու արգելքը և գրավը։ Երկվորյալ եղբայրներից մեկին, սակայն, կալանավորելու հարց է բարձրացվել։ Դավիթ Մինասյանին մեղադրանք է ներկայացվել Քրեական օրենսգրքի 297-րդ հոդվածի 1-ին մասով (խուլիգանությունը) և 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը)։

Հեղինակ՝ Իզաբել Սահակյան

Աղբյուր՝ Փաստինֆո