Ռուսաստանցի գիտնականներն աշխարհագրական հայտնագործություն են կատարել Անտարկտիդայում

Ռուսաստանցի գիտնականներն աշխարհագրական նոր օբյեկտ են հայտնաբերել Անտարկտիդայում։ Խոսքը Բերկսի հրվանդանում գտնվող օազիսի մասին է։ Այս մասին հայտնել է Ռուսաստանի գիտությունների ակադեմիայի Սանկտ Պետերբուրգի դաշնային հետազոտական ​​կենտրոնի մամուլի ծառայությունը։

Նշվում է, որ այս ​​կենտրոնի հետազոտողները, Արկտիկայի և Անտարկտիկայի գիտահետազոտական ​​ինստիտուտի գիտնականների հետ համատեղ, նկարագրել են Արևմտյան Անտարկտիդայի Բերկսի հրվանդանում գտնվող օազիսը։ Այս տարածքում նախկինում չուսումնասիրված 18 լճերի համապարփակ հետազոտությունը ցույց է տվել, որ օազիսը կայուն, ամբողջական կազմավորում է Երկրի մակերևույթին։

Օազիսը պատված է լեռներով և հովիտներով, այնտեղ օդի միջին տարեկան ջերմաստիճանը մոտավորապես -12 աստիճան է ըստ Ցելսիուսի սանդղակի, իսկ սառույցից զերծ գոտին զբաղեցնում է շուրջ 2.2 քառակուսի կիլոմետր։ Օազիսի կենդանական աշխարհի ներկայացուցիչներն են պինգվինները, փոկերը, անտարկտիկական մրրկահավերը և թռչունների մի քանի այլ տեսակներ։

«Անցյալում այս օազիսը համարվում էր նունատակ՝ սառցադաշտից դուրս ցցված սովորական ժայռ։ Այժմ, երբ մանրամասն նկարագրել ենք տարբեր պայմաններ ունեցող մեծ քանակությամբ լճեր, այս տարածքը լիովին կարելի է օազիս անվանել։ Արկտիկայի և Անտարկտիկայի գիտահետազոտական ​​ինստիտուտի գիտական խորհրդի որոշմամբ՝ աշխարհագրական նոր օբյեկտը անվանակոչվել է ականավոր բևեռախույզ և Անտարկտիդայի հետազոտող Առնոլդ Բուդրեցկու պատվին»,- նշել է Ռուսաստանի գիտությունների ակադեմիայի Սանկտ Պետերբուրգի դաշնային հետազոտական ​​կենտրոնի կրտսեր գիտաշխատող Արտեմ Լապենկովը։

Հաղորդվում է նաև, որ օազիսի վերջնական անվանումը հաստատելու է Անտարկտիկայի հետազոտությունների միջազգային գիտական ​​կոմիտեն (SCAR):