«Վալոդյայի ծանր շունչը զգում էի, բայց աչքերը փակ էին»․ գործով մեղադրյալ Գևորգ Հարությունյանը խոսել է

Երևան քաղաքի առաջին ատյանի ընդհանուր իրավասության քրեական դատարանի Աջափնյակ 1 նստավայրում այսօր` ապրիլի 3-ին, դատավոր Մուշեղ Արամյանի նախագահությամբ շարունակվեց Փարաքարի սպանված համայնքապետ Վալոդյա Գրիգորյանի գործով դատական նիստը:

Նիստի ժամանակ հետազոտվեցին քննչական գործողությունների տեսաձայնագրությունները:

Մեղադրյալ Գևորգ Հարությունյանը տեսաձայնագրություններից մեկում ասում է. «Ես կոնկրետ Վալոդյա Գրիգորյանին եմ ուզեցել սպանել, ասեմ, թե ինչի համար, որովհետև 2025 թվականին մահացավ Գրիգոր Օհանյանը: Նա իմ մոտիկ ընկերն էր, որին վիճաբանության ժամանակ սպանեցին: Էդ «կռուգի գլուխը» եղել ա Վալոդյա Գրիգորյանը: Ես կանգնած էի Վալոդյա Գրիգորյանի կիսակառույց տան մոտի թփերի հետևը: Դուրս եմ եկել, ֆռացել եմ դեպի իրենց և վազելու ընթացքում կրակել եմ: Սկզբում կրակել եմ ոտքերի հատվածին, որպեսզի Վալոդյա Գրիգորյանի հետ եղած անձինք փախնեն ինքը մնա մենակ, էն էլ չփախան: Կրակահերթ բացեցի: Հետո վազեցի դեպի դաշտավայր, բայց նորից հետ վազեցի, գնացի Վալոդյա Գրիգորյանի մոտ, կռացա, շունչը զգում էի, ծանր շնչում էր, բայց աչքերը փակ էին: Ուզում էի տեսնեի, թե ինչ վիճակում է»:

Տեսաձայնագրությունը դիտելուց հետո Գրիգոր Հարությունյանը հայտարարեց, որ շատ բաներ էլ կան, որոնք չեն նկարվել: Նա նշեց, որ, երբ հետազոտվեն ցուցմունքները, ինքը ավելի մանրամասն հայտարարություն կանի:

Հաջորդիվ հետազոտվեց տեսաձայնագրություն, որում Գևորգ Հարությունյանը ցույց է տալիս, այն վայրը, որտեղ կրակել է սովորել: Տեսագրությունը դիտելուց հետո նա հայտարարեց, որ դա մտացածին վայր է եղել :

«Սա իրանից ներկայացնում ա հորիված տեղ, իբր ես ըտեղ եմ պարապել, սովորել կրակել: Ինչի՞ համար եմ էդ արել. ես ո’չ ծառայել եմ, ո’չ զենքի եմ տիրապետում: Պտի խաբեի, մի բան ասեի»,-հայտարարեց մեղադրյալ Գևորգ Հարությունյանը:

Հաջորդիվ ուսումնասիրվեցին դիերի դատաբժշկական փորձաքննության արդյունքները: Վերցված արյան նմուշներում չի եղել էթիլ սպիրտ և թմրանյութեր:

Հիշեցնենք, որ 2025 թվականի սեպտեմբերի 23-ի ուշ երեկոյան Մերձավանում սպանվել էին Փարաքար համայնքի ղեկավար Վալոդյա Գրիգորյանը և ՀՀ ոստիկանության քրեական հետախուզության գլխավոր վարչության օպերլիազոր Կարեն Աբրահամյանը, վիրավորվել էր Արծրուն Գալստյանը։

Հիշեցնենք նաև, որ Փարաքարի համայնքապետի և նրա ընկերոջ սպանության գործով կալանավորված են Մերձավանի բնակիչներ Նարեկ Օհանյանն ու Գևորգ Հարությունյանը: Գևորգ Հարությունյանը մեղադրվում է սպանության, իսկ Նարեկ Օհանյանը սպանությանը օժանդակելու մեջ:

Նշենք, որ 2025 թվականի փետրվարին Մհեր Ախտոյանի տան վրա հարձակում էր եղել, ինչի հետևանքով Ախտոյանի զարմիկ 29-ամյա Գրիգոր Օհանյանը մահացել էր, իսկ ընկերը վիրավորվել էր։ Նշենք, որ Գրիգոր Օհանյանը, Վալոդյա Գրիգորյանի սպանության գործով մեղադրյալ, Նարեկ Օհանյանի եղբայրն է:

Հասմիկ Սարգսյան

24news.am