Թրամփը կհայտարարի, որ դուրս է գալիս Իրանի հետ պատերազմից. խայտառակության և կործանման միջև նա ընտրեց առաջինը․ Bloomberg

Թրամփը ելույթ կունենա և կհրապարակի «կարևոր տեղեկություններ Իրանի վերաբերյալ»: Մանրամասները դեռևս անհայտ են, սակայն, ըստ գործակալության աղբյուրների, Թրամփը փաստացի կհայտարարի, որ իր բոլոր խնդիրներն արդեն լուծել է, և իմաստ չունի շարունակել ռազմական գործողությունները:

Թրամփը նաև կհայտարարի, որ Հորմուզի նեղոցի բացման խնդիրը պիտի լուծեն այն երկրները, որոնց առաջին հերթին է հուզում դա:

«Ես կասեի՝ երկու շաբաթվա ընթացքում՝ գուցե երկու, գուցե երեք, մենք կհեռանանք, քանի որ մենք այնտեղ մնալու որևէ պատճառ չունենք», - երեքշաբթի հայտարարեց Սպիտակ տան ղեկավարը և չբացառեց այն հնարավորությունը, որ Իրանը և ԱՄՆ-ն համաձայնության կգան այս ընթացքում: Սակայն նշեց, որ նման համաձայնագիրը պարտադիր չէ՝ պատերազմն ավարտելու համար: Նա հավելեց, որ ԱՄՆ-ն կհեռանա այն բանից հետո, երբ համոզվի, որ զրկել է Իրանին միջուկային զենք ձեռք բերելու հնարավորությունից, և պնդեց, որ ներկայիս ռեժիմն ավելի լավն է, քան նախորդը:

«Մենք այժմ ռեժիմի փոփոխություն ունենք։ Իրականում դա իմ նպատակներից մեկը չէր։ Ես մեկ նպատակ ունեի։ Նրանք չէին ունենա միջուկային զենք, և այդ նպատակը ձեռք է բերվել։ Ոչ մի միջուկային զենք», - երեկ ասաց Թրամփը։

Նավթի գները փոքր-ինչ ամրապնդվեցին նախագահի վերջին ելույթներից հետո: Ասիական ֆոնդային ինդեքսները վերականգնվեցին 17 տարվա ընթացքում իրենց ամենավատ ամսական ցուցանիշից հետո՝ արտացոլելով հույս, որ համաշխարհային շուկաները ցնցած հակամարտությունը մոտենում է ավարտին:

Պետքարտուղար Մարկո Ռուբիոն Fox News-ին ասել է, որ ԱՄՆ-ն «տեսնում է վերջնագիծը» Իրանում, սակայն հավելել է, որ վարչակազմի նպատակներին չի հասնի հաջորդ մեկ-երկու օրվա ընթացքում: Ռուբիոն նաև նշել է, որ Իրանի պատերազմից հետո ԱՄՆ-ն ստիպված կլինի «վերագնահատել» ՆԱՏՕ-ի արժեքը:

«Ի՞նչ է լինելու նեղուցի հետ։ Մենք դրա հետ ոչ մի կապ չունենք, քանի որ այս երկրները, օրինակ՝ Չինաստանը, կնավարկեն դեպի նեղուց, կլիցքավորեն իրենց նավերը վառելիքով և կնավարկեն։ Ըստ էության, նրանք իրենք կհոգան իրենց մասին», - հայտարարեց Թրամփը Օվալաձև աշխատասենյակում։ «Մենք դա անելու ոչ մի պատճառ չունենք»։

«Ալ Ջազիրա»-ին տված հարցազրույցում Իրանի արտաքին գործերի նախարար Աբբաս Արաղչին հայտարարել է, որ իր երկիրը պատրաստ է ամերիկյան ուժերի հետ ցանկացած բախման: Նա հաստատել է ԱՄՆ հատուկ դեսպանորդ Սթիվ Վիտկոֆի հետ անմիջական շփումը, սակայն նշել է, որ դա «չի նշանակում, որ մենք բանակցություններ ենք վարում»: Նա հավելել է, որ Իրանը խիստ անվստահություն է տածում Վաշինգտոնի նկատմամբ և չի սպասում, որ բանակցությունները արդյունք կտան:

Թրամփի թիմը վերջերս ենթադրեց, որ պատերազմի ավարտը հնարավոր է նույնիսկ Հորմուզի նեղուցի շարունակական շրջափակման դեպքում, որի միջով անցնում է համաշխարհային նավթի արտահանման մինչև 20%-ը։

Վերջին իրադարձությունները ցույց են տալիս, որ Իսրայելի հետ համաձայնեցված Թրամփի կողմից սանձազերծված պատերազմը դուրս է եկել նրա վերահսկողությունից։ Սա, իր հերթին, սպառնում է զրկել Հանրապետական ​​կուսակցությանը Կոնգրեսում նոյեմբերյան միջանկյալ ընտրություններում ունեցած մեծամասնությունից։

Փորձագետների կարծիքով, ԱՄՆ-ն թերագնահատեց էներգամատակարարման խափանումները։ Թրամփը փորձեց Իրանից բխող ենթադրյալ սպառնալիքը տարանջատել պատերազմի ազդեցությունից նավագնացության վրա և պատասխանատվությունը տեղափոխել Մերձավոր Արևելքի էներգետիկ ռեսուրսներից անմիջականորեն կախված երկրների վրա։

Այսպիսով, երեքշաբթի օրը Թրամփը հայտարարեց, որ Միացյալ Նահանգները բավականաչափ նվազեցրել է Իրանի կողմից եկող ռազմական սպառնալիքը, որպեսզի նեղուցը կարողանա վերաբացվել առանց նրա մասնակցության։ Իսկ դա նշանակում է, որ Թրամփը պատրաստվում է այս պատերազմից «ձեռքերը լվանալ» և դուրս գալ՝ ողջ պատասխանատվությունը թողնելով տարածաշրջանի երկրների վրա:

Այսպիսով, Թրամփը կհայտարարի, որ մեկ շաբաթվա ընթացքում ԱՄՆ-ն դուրս կգա պատերազմից, քանի որ այլ երկրները շահագրգրված չեն, որ Հորմուզի նեղուցը բացվի, իսկ ԱՄՆ-ն միայնակ դրան չի գնա, քանի որ չի ուզում ուրիշների փոխարեն իրենց շահերը պաշտպանել:

Այս ամենը ցույց է տալիս, որ Թրամփը վերջապես սկսում է հասկանալ, որ իրեն խաբել են, որ ռմբակոծություններով հնարավոր փոխել Իրանում ռեժիմը:

Նա փաստացի գնաց այդ արկածախնդրությանը և արդյունքում հայտնվեց ինքն իր ծուղակի մեջ, որից սակայն տուժեցին աշխարհի գրեթե բոլոր երկրները:

Սա է իրականությունը:

Արտակ Հակոբյան
Աղբյուրը՝ Zham.am