Օրվա քո պատգամը. Ավագ երեքշաբթի

«Մենք պետք է միշտ պատրաստ լինենք Տիրոջ հետ հանդիպմանը՝ ապաշխարությամբ, մաքրված, բարի ու լուսավոր գործերով: Չհետաձգե՛նք մեր բարի գործերը, ապրենք հոգևոր կյանքով, այսօր քայլենք դեպի Աստված տանող ճանապարհով: Մենք չգիտենք Տիրոջ գալստյան օրն ու ժամը, այդ պատճառով պետք է միշտ պատրաստվենք: Երբ Տերը գա ու պատրաստ չլինենք, կլսենք այս խոսքը. «Չեմ ճանաչում ձեզ» (Մատթեոս 25:1-13):

Փրկությունը չենք կարող հենց այնպես ժառանգել, այն անհատական ընթացք է, որով պետք է քայլենք յուրաքանչյուրս». Տեր Հուսիկ քահանա Դոխոլյան

Գիտեի՞ր, որ…

Ավագ երեքշաբթի՝ Երեկոյան ժամերգության ընթացքում, եկեղեցու ատյան են դուրս գալիս տասը մանուկներ: Նրանցից հինգի ձեռքին լինում են վառվող մոմեր, որոնք խորհրդանշում են իմաստուն կույսերին, իսկ մյուս հինգի հանգած մոմերը խորհրդանշում են հիմար կույսերին: Օրվա խորհուրդը ներկայացնում է «Տասը կույսերի» առակը: Հինգ իմաստուն ու հինգ հիմար կույսեր դուրս են գալիս Փեսային դիմավորելու։ Իմաստուն կույսերն իրենց հետ լրացուցիչ ձեթ են վերցնում, իսկ հիմարները՝ ոչ: Երբ ձեթը վերջանում է, հիմար կույսերը գնում են ձեթ գնելու։ Գալիս է Փեսան, հինգ իմաստուն կույսերը նրա հետ մտնում են հարսանիքի սրահ, իսկ մյուսները երբ ուշացած հասնում են, Փեսան պատասխանում է, թե չի ճանաչում նրանց: Հիշատակվող տասը կույսերը խորհրդանշում են հավատացյալներին, լապտերները՝ մեր հավատքը, յուղը՝ մեր կյանքի բարի գործերը, իսկ փեսան Տերն է: Երկնքի Արքայության դուռը փակվում է նրանց առաջ, ովքեր բարի գործեր չեն կատարում:

Առավել մանրամասն՝ այստեղ