Երուսաղեմում Ճրագալույցի արարողությունը կանցնի առանց ուխտավորների և զբոսաշրջիկների

Ավագ շաբաթ օրը՝ ապրիլի 11-ին, Ճրագալույցի արարողությունը կանցկացվի սահմանափակ ձևաչափով, Երուսաղեմի Հին քաղաքի սրբավայրերը փակ կմնան ուխտավորների և զբոսաշրջիկների համար։ Այս մասին հայտնում է ռադիո Sputnik-ը՝ հղում անելով Իսրայելի ոստիկանությանը։

«Հաշվի առնելով, որ ներկա իրավիճակը թույլ չի տալիս զանգվածային արարողություններ անցկացնել՝ Զատկի միջոցառումները կլինեն խորհրդանշական և սահմանափակ ձևաչափով։ Ստեղծված արտակարգ իրավիճակի և թիկունքի հրամանատարության ցուցումների պատճառով՝ Հին քաղաքի սրբավայրերը փակ կմնան հավատացյալների լայն հասանելիության համար՝ ելնելով մարդկային կյանքի պաշտպանության և պահպանման վերաբերյալ ոստիկանության օրինական ու բարոյական պարտավորությունից»,-ասված է X սոցիալական ցանցում ոստիկանության մամուլի ծառայության էջում հրապարակված հայտարարության մեջ։

Որոշումն ընդունվել է Երուսաղեմի լատինական պատրիարք, կարդինալ Պիերբատիստա Պիցաբալայի հետ հանդիպման արդյունքում, որին մարտի 29-ին թույլ չէին տվել մտնել Սուրբ Հարության տաճար։

Հիշեցնենք, որ 2020 թվականին COVID-19 համավարակի պատճառով Ճրագալույցի արարողությունը նույնպես անցկացվել էր առանց հավատացյալների ներկայության։