Իրանում կախաղան են բարձրացրել հունվարյան զանգվածային անկարգությունների երկու կազմակերպիչներին․ Tasnim

Իրանում հակակառավարական անկարգությունների երկու մասնակիցներ են մահապատժի ենթարկվել։ Նրանք կապված են եղել «Մոջահեդին-է Խալք» («Իրանի ժողովրդի մոջահեդների կազմակերպություն», արգելված է Իրանում) ահաբեկչական խմբավորման հետ։ Այս մասին հայտնել է Tasnim գործակալությունը:

Ըստ գործակալության տվյալների՝ մեղադրյալները մեղավոր են ճանաչվել ահաբեկչական գործողություններ կազմակերպելու, այդ թվում՝ Թեհրանում նռնակաձիգի կիրառմամբ զինված հարձակում իրականացնելու մեջ։ Քննության և դատավարական գործընթացների ավարտից հետո երկուսն էլ դատապարտվել են մահապատժի։ Իրանի Գերագույն դատարանը հաստատել է դատավճիռը։ Մարտի 30-ի առավոտյան դատապարտյալները կախաղան են բարձրացվել։

Իրանում հուզումներն սկսվել են 2025 թվականի դեկտեմբերի 29-ին՝ ռիալի փոխարժեքի կտրուկ անկմամբ պայմանավորված փողոցային բողոքի ցույցերից հետո, և տարածվել են խոշոր քաղաքների մեծ մասում։ Ինչպես հայտարարել է Իրանի արտաքին գործերի նախարար Աբբաս Արաղչին, 2026 թվականի հունվարի 8-ից ցուցարարների շրջանում հայտնվել են զինված ահաբեկիչներ։ Թեհրանն անկարգությունների կազմակերպման պատասխանատվությունը բարդել է Իսրայելի և ԱՄՆ-ի վրա։ Հունվարի 23-ին Արաղչին հայտնել էր, որ զոհերի ընդհանուր թիվը կազմել է 3 117 մարդ, որոնց թվում կան ինչպես խաղաղ քաղաքացիներ, այնպես էլ անվտանգության ուժերի աշխատակիցներ։