Արդեն նոր փուլ պետք է սկսել, երբ պետական մասնակցությամբ խրախուսվի հայրենադարձությունը. Քոչարյան
Մենք անցյալում իրականացրել ենք Հայաստան-Սփյուռք հարաբերությունների վերանորոգումը, որովհետև վատ կետից էինք սկսել, բայց նաև շեշտակի զարգացրել ենք այդ հարաբերությունները և կարծում եմ այստեղ փոխադարձ շահավետությունն ուղղակի ակնհայտ էր։ Այս մասին, այսօր՝ մարտի 26–ին, հայրենադարձների հետ հանդիպման ժամանակ նշեց «Հայաստան» դաշինքի առաջնորդ Ռոբերտ Քոչարյանը։
«Սփյուռքը հզոր ուժ է, բայց նաև սփյուռքը պատրաստ ենթակառուցվածքներ է Հայաստանից արտագաղթելու համար, որովհետև բոլորը ունեն բարեկամներ, եթե Հայաստանում անվտանգությունը ապահովված չի, եթե Հայաստանում մարդիկ վատ են ապրում, եթե մթնոլորտը զզվելի է, ապա ոչ թե սկսում ենք խոսել հայրենադարձության մասին, այլ հայրենափախուստի, հայրենիքից դուրս գնալու մասին։ Կարծում եմ բոլորի մտքում միայն մեկ բան է՝ դեպի Հայաստան։
Եթե մենք ուզում ենք, որ լինի հայրենադարձություն, մենք պետք է Հայաստանում այնպիսի միջավայր ձևավորենք, որ Հայաստան գալը, մնալը, այստեղ ապրելը լինի հաճելի, հասկանալի, որ մարդիկ ձգտեն գալ այս ընկալ այստեղ։ Եթե վատ մթնոլորտ լինի այստեղ, Հայաստանից արտագաղթը դեպի այլ երկրներ ակտիվանալու է։ Եթե Հայաստանի ղեկավարությունը այդքանը չի հասկանում, ուրեմն հայկական ղեկավարություն չի, կամ ես չգիտեմ՝ ինչ շահերով է առաջնորդվում։
Մենք Սփյուռքի հետ հարաբերությունները վերանորոգել ենք, զարգացրել ենք, բայց այնուամենայնիվ ես չեմ կարող ասել, որ դա պետական աջակցության ծրագրեր էին, դա ավելի շատ մթնոլորտ ստեղծել էր, որ մեր հայրենակիցները ձգտում ունենան գալ Հայաստան։ Օրինակ ես հայտարարում էի, երբ շինարարություն էինք այստեղ զարգացնում, որ ամեն մի սփյուռքահայ պետք է բնակարան կամ տուն ունենա Հայաստանում և շատ և շատ մարդիկ արձագանքեցին դրան։ Այն ժամանակ, ես հիշում եմ, տարբեր տեղերից մարդիկ այստեղ ռեստորաններ էին բացում, ես անձամբ, հենց որ լսում էի մի սփյուռքահայ ռեստորան էր բացում, անպայման հաճախում էի այդ ռեստորանը՝ ցույց տալու համար, որ մենք գիտենք և ուրախ ենք և ողջունում ենք այ այս ամենը»,–ասաց Քոչարյանը։
Նա ընդգծեց, որ արդեն նոր փուլ պետք է սկսել, երբ պետական մասնակցությամբ խրախուսվի հայրենադարձությունը. «Աշխարհում այդպիսի փորձերը շատ չեն, որովհետև շատ չեն ժողովուրդները, որ նման կարգի սփյուռք ունեն։ Ամենից հետաքրքիր փորձը, իհարկե, Իսրայելի փորձն է, որտեղ կա հայրենադարձության մասին օրենք և հստակ ծրագիր, թե ինչ են անում, ոնց են աջակցում։ Այդ ամբողջ պրոցեսը պետությունը սարքել է իր քաղաքականության կարևոր մաս և դա քայլ առ քայլ իրագործում է քաղաքացու դրսից գալուց սկսած մինչև երկրում ադապտացիայի ամբողջ շրջանը։
Երևի ժամանակն է անցնել նման կարգի քաղաքական մոտեցումների։ Չեմ կարող ասել, որ հիմա դա ամբողջությամբ մշակված ունենք, բայց այդ միտքը ունեմ և կարծում եմ, որ մենք կարող ենք, հենց այս ճանապարհով փորձենք առաջ շարժվել»,– ընդգծեց երկրորդ նախագահը։
Հետևեք մեզ Viber-ում
