Ունենք պարզեցված հարկի ծրագիր․ փոքր-միջին բիզնեսը հարկայինի աշխատողի երեսը չպետք է տեսնի․ Քոչարյան

Պարզեցված հարկի վերաբերյալ ես կարող եմ նաև բացատրել, թե ինչի ենք մենք այն ժամանակ այդ քայլին դիմել. Ես այն ժամանակ նկատում էի, որ հայերը բիզնես անելու մեծ ձգտում ունեն, մեզ մոտ 100-ից 70 ուզում էին բիզնեսով զբաղվել, և մենք մտածեցինք՝ ի՞նչ անել, որ բիզնես սկսելու գործը հեշտացնենք։ Այս մասին, այսօր՝ մարտի 26–ին, հայրենադարձների հետ հանդիպման ժամանակ նշեց «Հայաստան» դաշինքի առաջնորդ Ռոբերտ Քոչարյանը։

«Ամենից պարզ բանը այդ պարզեցված հարկն էր, երբ 1998 թվականին փոքր-միջին բիզնեսը կազմում էր ընդամենը ՀՆԱ–ի 13%–ը, իսկ երբ ես իշխանությունը հանձնում էի արդեն, 46% էր կազմում։ Այդ մոտեցումը, այդ խրախուսումը հսկայական արդյունք տվեց։ Ինձ համար երազելի նպատակ կլիներ, որ փոքր ու միջին բիզնեսը կազմեր ՀՆԱ–ի 70 տոկոսը։

Այո, հիմա ևս այդ նպատակը ունենք. պարզեցված հարկ, որ փոքր ու միջին բիզնեսում աշխատողը, որ հնարավորություն չունի հաշվապահ պահի, ինչ-որ հատուկ ֆինանսիստ պահի, ինքը հարկային աշխատողի երես չպետք է տեսնի, շփում չպետք է ունենա։ Հիմա սմարթֆոններն էլ այդ հնարավորությունը տալիս են։ Մեր ծրագրում սա արտացոլված է լինելու, քանի որ այդ փորձը ունեմ և դրա էֆեկտը ես տեսել եմ, հսկայական էֆեկտ էր»,–ասաց նա։

Քոչարյանը նկատեց, որ երկրի իշխանությունը պետք է լավ հասկանա, թե իր մրցակցային առավելությունը որն է. «Օրինակ կորպորատիվ կառավարում Հայաստանում չէր ստացվում, մարդիկ ավելի շատ հակված էին ընտանեկան բիզնեսում գործել։ Ես մեծ, կորպորատիվ ընկերությունում աշխատել եմ, գիտեմ դա ինչ է, հայերի մոտ մի քիչ դժվար է գնում։ Ուրեմն այդ էթնո-մշակույթային հանգամանքը մենք պետք է ամուսնացնենք մեր քաղաքականության հետ, այդ դեպքում էֆեկտիվությունը շատ ավելի մեծ է դառնում։ Դու երկու քայլ անում ես, հաջորդ քայլը ժողովուրդը ինքն է անում արդեն։ Առաջին խմբագրության Սահմանադրությունը սրա վրա ուղղակի արգելք էր դրել, և սահմանադրական բարեփոխումների գնալու իմ մոտիվացիան հիմնականում դա էր»,– ընդգծեց նա։