Բագրատ Սրբազանը ցուցմունք տալու համար պահանջել է ՔԿ նախագահի, գլխավոր դատախազի և վարչապետի ներկայությունը դատարանում
Արքեպիսկոպոս Բագրատ Գալստանյանը պահանջել է ապահովել Քննչական կոմիտեի նախագահի, գլխավոր դատախազի և վարչապետի ներկայությունը դատարանում՝ ցուցմունքներ տալու համար։
Մարտի 26-ի նիստում ելույթ ունենալիս սրբազանը հերթական անգամ հիշեցրել է, որ Քննչական կոմիտեի նախագահը, խախտելով անմեղության կանխավարկածը, պնդել է, թե իբր գոյություն ունի Գալստանյանի ձեռքով գրված «ահաբեկչական ծրագիր»։ «Ձեռագրաբանական փորձաքննություն չի իրականացվել, ի՞նչ հիմքով է նման պնդում արվում։ Նշանակում է՝ նա տեղեկություն ունի։ Թող գա և ցուցմունք տա։ Նա չի պատասխանում դիմումներին, ԱԺ-ում հարցերին չի պատասխանում, խուսափում է շփումներից։ Այսինքն՝ մեր նկատմամբ անմեղության կանխավարկածը չի՞ գործում, իսկ ինքն անձեռնմխելի՞ է։ Գլխավոր դատախազը ԱԺ ամբիոնից և հեռուստատեսությամբ խոսում է մեր կողմից մարդկանց կյանքից զրկելու մտադրության մասին։ Թող նա էլ գա ու ցուցմունք տա։ Գուցե նրանք այլ երկրի՞ց տեղեկություն ունեն։ Այստեղ չէ՞ որ լրտեսական ցանց է գործում, հիբրիդային պատերազմ», - նշել է Բագրատ Գալստանյանը՝ հավելելով. «Ես իմ խոսքերի համար պատասխանատու եմ։ Իսկ նրանք ասում են այն, ինչ մտքներով անցնում է։ Եվ վարչապետի պաշտոնը զբաղեցնողը նույնպես պետք է պատասխան տա այստեղ։ Նա հնչեցրել է կոնկրետ մեղադրանքներ։ Որտե՞ղ պետք է պատասխան տան, եթե ոչ դատարանում։ Թող գան վկայի կարգավիճակով և ցուցմունք տան»։
Սրբազանն ընդգծել է՝ ստացվում է, որ քաղաքացիներն ամենևին պաշտպանված չեն բարձրաստիճան պաշտոնյաների կեղծ մեղադրանքներից. «Որտե՞ղ պետք է պատասխան տան, եթե ոչ դատարանում։ Թե՞ նախընտրում են պատասխան տալ Աստծո դատաստանի առաջ»։
Մյուս ամբաստանյալները սատարել են արքեպիսկոպոսին. «Մեզ անվանել են ահաբեկիչներ, բայց 8 ամսվա ընթացքում ոչ մի ապացույց չեն ներկայացրել։ Բոլորը հավասար են օրենքի առաջ։ Եթե մենք ահաբեկիչ ենք՝ ապացուցեք, բայց եթե մեզ զրպարտել եք՝ պետք է պատասխան տաք»։
Բագրատ Գալստանյանը մեկնաբանել է նաև Եվրախորհրդարանում Փաշինյանի կողմից այս գործի հիշատակումը. «Դա ցույց է տալիս, որ գործը քաղաքական է։ Հակառակ դեպքում ինչո՞ւ է վարչապետը եվրոպական ամբիոնից խոսում այդ մասին»։ Հավելելով որ եթե դա սովորական քրեական գործընթաց է, ապա ինչո՞ւ է նա խառնվում դրան։
Հետևեք մեզ Viber-ում
