«ԱՄՆ-ի պատժամիջոցները Ռուսաստանի դեմ ունեն մի նպատակ՝ Ռուսաստանը դարձնել ժողովրդավարական երկիր». Լևոն Շիրինյան
«Հայելի» մամուլի ակումբի այսօրվա ասուլիսում քաղաքագետ Լևոն Շիրինյանը խոսեց Ռուսաստանի ռազմաարդյունաբերական ընկերությունների դեմ՝ ԱՄՆ-ի սահմանած նոր պատժամիջոցների և դրանց հետևանքների մասին: Բանախոսը նշեց, որ Ադրբեջանին զենք մատակարարելն արտաքնապես ունի կոմերցիոն բնույթ, իսկ ներքին իմաստով՝ ուղղված է Հայաստանի, Իրանի և Թուրքմենստանի դեմ: Նա նաև հավելեց. «ԱՄՆ-ի պատժամիջոցները Ռուսաստանի դեմ ունեն մի նպատակ՝ Ռուսաստանը դարձնել ժողովրդավարական երկիր, քանի որ նա կարող է ապակայունացնող դեր խաղալ Կովկասում: Ապրիլյան պատերազմը, ըստ էության, սանձազերծվեց ռուսական զենքի մատակարարման հետևանքով, ինչին մենք կարողացանք դիմակայել: Պետք է նկատի ունենալ, որ Ադրբեջանի հետագա զինումը կարող է Իրանի հարցում խիստ բացասական դեր խաղալ»: Քաղաքագետը մտավախություն հայտնեց, որ Ռուսաստանը՝ կարող է մեզ սահմանափակելու համար օգտագործել, այսպես կոչված, դարչնագույն զանգվածը և 5-րդ շարասյան պարագան, ինչը շատ վտանգավոր է: «Մենք պետք է բացահայտ ասենք, որ 5-րդ շարասյունը Հայաստանի Առաջին Հանրապետության պետական դավաճանության և կործանման ուժն է եղել, ուրիշի ձեռքին գործիք՝ ռուս-թուրքական համագործակցության համատեքստում: Այս շարասյունը այլևս չպետք է գործի Հայաստանում, ինչը նաև պետական մարմինների խնդիրն է»,- եզրափակեց Լևոն Շիրինյանը: Քրիստինե Աղաբեկյան
Հետևեք մեզ Viber-ում
