Կիպրոսը ձգտում է հասնել կղզուց բրիտանական ռազմակայանների դուրսբերմանը․ Phileleftheros

Կիպրոսի Հանրապետության իշխանությունները նպատակ են դրել երկարաժամկետ հեռանկարում հասնել կղզուց բրիտանական ռազմակայանների դուրսբերմանը։ Այս մասին երեքշաբթի հայտնել է կիպրական Phileleftheros թերթը՝ հղում անելով կառավարության սեփական աղբյուրներին։

Պարբերականի ստացած տեղեկությունների համաձայն՝ պաշտոնական Նիկոսիան մտադիր է Լոնդոնի հետ համատեղ ստեղծել տեխնիկական հանձնաժողով՝ Կիպրոսում բրիտանական հենակայանների կարգավիճակը երկկողմ ձևաչափով քննարկելու համար։

Կղզի պետության նախագահ Նիկոս Քրիստոդուլիդիսն արդեն հայտարարել է Միացյալ Թագավորության իշխանություններին, որ Ակրոտիրի և Դեկելիա բրիտանական ռազմակայանները համարում է Կիպրոսի պատմության գաղութատիրական շրջանի մնացորդ։ Անցած երկուշաբթի նա Կիպրոսի Ազգային խորհրդի անդամներին (պետության ղեկավարին կից գործող գլխավոր խորհրդակցական մարմինը, որին մասնակցում են խորհրդարանական կուսակցությունների առաջնորդները) ներկայացրել է նշված խնդրի վերաբերյալ իր մոտեցման հիմնական սկզբունքները՝ հիշատակելով Նիկոսիայի կողմից արդեն իսկ ձեռնարկված մի շարք քայլերը։

Մասնավորապես, պարբերականի աղբյուրները հայտնել են, որ նիստի ընթացքում Ազգային խորհրդի մի շարք անդամներ զսպվածություն են ցուցաբերել՝ կասկած հայտնելով Միացյալ Թագավորության հետ «ճակատ բացելու» նպատակահարմարության հարցում, քանի դեռ բուն Կիպրոսի հիմնախնդիրը մնում է չլուծված։ Նրանք նաև առաջարկել են հաշվարկել բրիտանական հենակայանների դուրսբերման պաշտոնական նախաձեռնության նկատմամբ Լոնդոնի հնարավոր արձագանքը։ Նրանք Քրիստոդուլիդիսի կառավարությանը խորհուրդ են տվել կենտրոնանալ բրիտանական իրավասության տակ գտնվող տարածքներում բնակվող կիպրացիների գործնական խնդիրների վրա։ Միաժամանակ, Խորհրդի նիստում ընդգծվել է, որ կիպրական իշխանությունները պետք է որոշակի զգուշավորություն ցուցաբերեն այս հարցում։

Մարտի 2-ին Ակրոտիրի ավիաբազան ենթարկվել է անօդաչու թռչող սարքերի հարձակման։ Դա տեղի է ունեցել այն բանից հետո, երբ Մեծ Բրիտանիայի վարչապետ Քիր Սթարմերը հայտարարել էր, որ հավանություն է տալիս թագավորության ռազմակայաններն Իրանի հրթիռային պահեստներին հարվածելու համար օգտագործելու ԱՄՆ-ի խնդրանքին։ ԱԹՍ-ի հարվածի հետևանքով վնաս է հասցվել բազային։ Կղզու արտաքին գործերի նախարար Կոնստանտինոս Կոմբոսը հայտարարել է, որ բոլոր անօդաչուները արձակվել են Լիբանանի տարածքից։