Ինչո՞ւ է աղմկում Նիկոլը
Մի կողմից Փաշինյան Նիկոլը ՔՊ-ականներին փորձում է համոզել, թե իբր հունիսի 7-ի ընտրություններին 65 տոկոս են խփելու, մյուս կողմից անհանգիստ ու վախեցած ջղաձգվում է։
Հերթական անգամ հայ ժողովրդին սպառնում է նոր պատերազմով՝ գրեթե բառացի ասելով՝ թե ինձ չընտրեք՝ պատերազմ է լինելու։ Եթե այդքան վստահ ես, որ 65 տոկոս խփելու ես, էլ ինչո՞ւ ես խեղճ ժողովրդին պատերազմով սպառնում։ Նման ջղաձգումը բավարար է ֆիքսելու, որ խիստ անհանգստացած է վերահաս պարտությամբ ու հուսահատ փորձում է պատերազմի շանտաժով իրավիճակ փրկել։
Դեռ մի կողմ, որ իր անհեռատես ու արկածախնդիր քայլերի պատաճառով Հայաստանը աչք չի բացում պատերազմներից ու կորուստներից։ Բայց ամենազավեշտալին այն է, որ Ալիևի բարեհաճությանը հանձնվելը, անվերջ զիջելն ու նվաստանալը Նիկոլը համարում է խաղաղություն։ Իրականում ագրեսորին զսպելու հանձնվողական այս քաղաքականությունն է պատերազմով ականապատում Հայաստանի տեսանալի ապագան։
Ալիևի պահանջները Հայաստանից անվերջ են, Բաքվի բռնապետը բավարարված կլինի այն ժամանակ, երբ Հայաստանը դառնա Արևմտյան Ադրբեջան։ Այդ ռազմավարության մասին Բաքվից բացահայտ հայտարարվում է։ Ալիևը ՔՊ-ական իշխանության ջանքերի շնորհիվ թուլացած, պառակտված ու միայնակ մնացած Հայաստանի նկատմամբ ագրեսիայի չի դիմում այն պատճառով, որ Փաշինյան Նիկոլը բավարարել ու պատրաստակամություն է հայտնում առաջիկայում էլ բավարարել նրա բոլոր պահանջները։
Բաքվին զսպելու, անվտանգություն ու իրական խաղաղություն ապահովելու համար երկու կարևոր գործոն կա՝ Հայաստանի տնտեսական և ռազմական պոտենցիալի մեծացում ու միջազգային երաշխիքների գործարկում։ Առանց վերոհիշյալ 2 գործոնի ապահովման, Ալիևի ու Փաշինյանի կողմից ստորագրված որևէ թղթի կտոր չի կարող երաշխիք լինել որևէ տիպի խաղաղության համար։
Հայաստանը Արևմտյան Ադրբեջան դարձնելու ճանապարհին յուրաքանչյուր խոչընդոտի դեպքում Ալիևը սպառնալու է պատերազմ սանձազերծել։
Քանի որ Փաշինյան Նիկոլը պատրաստակամություն է հայտնում այս ճանապարհին բավարարել Ալիևի բոլոր պահանջները, ուստի ավտոմատ դառնում է Ալիևի սրտի վարչապետն ու թեկնածուն։ Պատկերավոր ասած՝ Նիկոլ Փաշինյանը ձգտում է դառնալ ոչ թե Հայաստանի վարչապետ, այլ Արևմտյան Ադրբեջանի քյոխվա։
Նիկոլ Փաշինյանի հանձնվողական քաղաքականությունը Հայաստանին տանում է ոչ թե «հավերժական խաղաղության», այլ՝ երաշխավորված պատերազմի։
«Մայր Հայաստան» կուսակցության վարչության անդամ Դերենիկ Մալխասյանի ֆեյսբուքյան էջից
Հետևեք մեզ Viber-ում
