Քոչարյանի որդու ընկերությունը զրկվում է մենաշնորհից. armtimes.com
Բագրատաշենի մաքսատնից որոշակի հեռավորության վրա գործունեություն ծավալող ԱՊՊԱ գործակալները որոշակի հաջողություններ են արձանագրել: Այսօր Բագրատաշենի մաքսատան տարածքում շուրջ 10 օր գործունեություն ծավալած «Թոփ-Սփին» ՍՊԸ-ի գրասենյակը ժամանակավորապես դադարեցրել է աշխատանքները: Նշենք, որ այս ընկերությունը տարածք էր վարձակալել մաքսատան վարչական տարածքում եւ հանդիսանալով «Նաիրի ինշուրանս» ապահովագրական գործակալության գործընկերը՝ ԱՊՊԱ պայմանագրեր էր կնքում: Մաքսատնից որոշակի հեռավորության վրա տեղակայված գրասենյակների ԱՊՊԱ գործակալները բողոքում էին անհավասար պայմաններից: Վերջիններս 10 օրում երկու անգամ փակել են Բագրատաշենի ճանապարհը, դիմել են վարչապետ Կարեն Կարապետյանին եւ այլ պաշտոնատար անձանց: Թոփ-Սփին» ընկերությունը հիմնադրվել է 2013 թվականին: Միակ հիմնադրի ու տնօրենի անունը Լուսինե Արսենյան է, որը ոչնչով հայտնի չէ ԱՊՊԱ գործակալներին: «Նաիրի Ինշուրանս» ապահովագրական գործակալության պաշտոնական կայքում՝ գործակալների ցանկում նշում կա, որ «Թոփ-Սփին»-ը հանդիսանում է իրենց գործակալը: «Թոփ-Սփին» ՍՊԸ-ի հիմնադիր Լուսինե Արսենյանը հաշվառված է Լոռու մարզկենտրոն Վանաձոր քաղաքում: Նույն հասցեում է հաշվառված վերջինիս ամուսինը՝ Հրանտ Խալաթյանը: Խալաթյանի ֆեյսբուքյան էջում առկա տեղեկության համաձայն, նա հանդիսանում է «Նաիրի ինշուրանս» ապահովագրական ՍՊԸ-ի մասնաճյուղի տնօրենը: Նշենք նաեւ, որ «Նաիրի Ինշուրանս» ապահովագրական ընկերության հիմնադիրներից է հանդիսանում Ռոբերտ Քոչարյանի որդին՝ Լեւոն Քոչարյանը: Վերջինս այսօր էլ ընկերության խորհրդի անդամ է:
Հետևեք մեզ Viber-ում
