Իրանի և Ֆրանսիայի նախագահները քննարկել են տարածաշրջանային վերջին զարգացումները

Իրանի նախագահ Մասուդ Փեզեշքիանը հեռախոսազրույց է ունեցել ֆրանսիացի գործընկեր Էմանուել Մակրոնի հետ և քննարկել իրավիճակը Մերձավոր Արևելքում՝ Իրանի հետ ԱՄՆ-ի և Իսրայելի շարունակվող հակամարտության ֆոնին։

«Իրանի և Ֆրանսիայի նախագահները հեռախոսազրույցի ընթացքում քննարկել են տարածաշրջանային վերջին զարգացումները»,- հայտնել է Իրանի նախագահի մամուլի ծառայությունը։

Մակրոնն էլ իր հերթին հայտարարել է, որ կոչ է արել Փեզեշքիանին «անհապաղ դադարեցնել անընդունելի հարձակումները» տարածաշրջանի երկրների դեմ։

Ֆրանսիայի նախագահը նաև նշել է, որ սրացումն ամբողջ տարածաշրջանը քաոսի մեջ է գցում և լուրջ հետևանքներ ունի, որոնց համար «վճարում» են Իրանի ժողովուրդը և տարածաշրջանի երկրները։

«Միայն նոր քաղաքական շրջանակը և անվտանգության համակարգը կապահովեն խաղաղություն բոլորի համար։ Նման համակարգը պետք է երաշխավորի, որ Իրանը երբեք միջուկային զենք չի ունենա, կվերացնի իր բալիստիկ հրթիռային ծրագրից բխող սպառնալիքները և կհրաժարվի տարածաշրջանային և միջազգային կայունությունը խաթարող քայլերից»,- հայտարարել է Մակրոնը։