Ալիևը պետք է կանգնի դատարանի առաջ՝ 150,000 արցախահայերի էթնիկ զտման և Արցախի հայաթափման համար. Արտակ Բեգլարյանի հարցազրույցը «France 24»-ին

«France 24» հեռուստաալիքի գլխավոր «Tête-à-Tête» հաղորդման շրջանակներում ներկայացրել եմ ալիևյան ռեժիմի հանցավոր բնույթը և Արցախի ժողովրդի դեմ իրականացվող շարունակական ցեղասպանությունը: Այս մասին իր ֆեյսբուքյան էջում գրել է Արցախի նախկին պետնախարար Արտակ Բեգլարյանը՝ հրապարակելով «France 24» հեռուստաալիքին տված հարցազրույցը։

«Ի պատասխան մեկ ամիս առաջ նույն հարթակում Ալիևի հնչեցրած կեղծիքների ու զրպարտությունների՝ ընդգծել եմ, որ հենց ինքն է նացիստ առաջնորդ, ում քաղաքականությունը հիմնված է ցեղասպանության և մարդկության դեմ ուղղված հանցագործությունների վրա:

Հայելային մեղադրանքներ և Նյուրնբերգյան դատարանի անհրաժեշտությունը

Արձագանքելով Ալիևի կողմից մեր առաջնորդներին «Հոլոքոստի կազմակերպիչների» հետ համեմատելու կեղծ պնդումներին՝ դրանք որակել եմ որպես դասագրքային «հայելային մեղադրանքներ»: Իրականությունն այն է, որ հենց Ալիևը պետք է կանգնի ժամանակակից Նյուրնբերգյան դատարանի առաջ՝ 150,000 արցախահայերի էթնիկ զտման և Արցախի հայաթափման համար: Միջազգային հանրության անգործությունը միայն խրախուսում է այս ցեղասպան քաղաքականությունը:

Պատանդները որպես նվաստացման գործիք

Բաքվում ապօրինաբար պահվող 19 հայ պատանդները, այդ թվում՝ Արցախի քաղաքական ղեկավարությունը, Ալիևի ձեռքում օգտագործվում են որպես խաղաքարտ՝ հայ ազգին նվաստացնելու համար: Նրանց նկատմամբ կայացված շինծու դատավճիռները արդարադատության խորը ձախողում են և ցեղասպանական մտադրության ուղղակի դրսևորում: Սա կոլեկտիվ պատիժ է մի ամբողջ ժողովրդի դեմ՝ իր ինքնորոշման իրավունքը պաշտպանելու համար:

Վաշինգտոնյան հռչակագիրը և մեր իրավունքների անտեսումը

Անդրադարձել եմ նաև 2025 թվականի օգոստոսին Վաշինգտոնում ստորագրված հռչակագրին: Փաստաթղթում Արցախի կարգավիճակի, մեր ժողովրդի իրավունքների և անվտանգության լիակատար անտեսումը որակել եմ որպես քաղաքական դավաճանություն Հայաստանի իշխանությունների կողմից: Որևէ թուղթ չի կարող երաշխավորել տևական խաղաղություն, եթե այն չի պաշտպանում մեր ժողովրդին, մեր 400 եկեղեցիները և 6,000 մշակութային հուշարձանները բնաջնջման ձգտող վարչակարգից:

Անդրդվելի պայքար վերադարձի իրավունքի համար

Մեր պայքարը շարունակվում է՝ անկախ աշխարհաքաղաքական շահերից: Մենք պահանջում ենք վերադարձ մեր հայրենի տներ՝ միջազգային հստակ անվտանգային երաշխիքների ներքո: Ցեղասպանությունը երբեք չի կարող հիմք հանդիսանալ խաղաղության համար, իսկ արդար աշխարհակարգը պետք է ի վերջո պատասխանատվության ենթարկի Ալիևի հանցավոր վարչակարգին:

Հարցազրույցի ամբողջական տեսանյութը հասանելի է մեկնաբանությամբ տեղադրված հղումով»,- գրել է նա: