ANCA-ի տարածած տեղեկությունը զրպարտություն է․ Նժդեհ Հովսեփյան

Պատմաբան, փոխվարչապետի նախկին մամուլի քարտուղար Նժդեհ Հովսեփյանն անդրադարձել է Հայ դատի ամերիկյան կոմիտեի հայտարարությանը․

«Հայ դատի ամերիկյան կոմիտեն (ANCA) ինչ-որ հայտարարություն է տարածել, թե իր դեմ ադրբեջանական արշավ է իրականացվում, որին ներգրավված են նաև հայեր։ ANCA-ն հրապարակել է ինչ-որ նամակ, և նվաստիս անունն էլ է տեղ գտել այդ «արշավողների» ցուցակում։

Շատ հստակ հայտնում եմ՝ ինձ հետ նշված հարցով որևէ մեկը չի կապվել, որևէ խոսակցություն այդ թեմայով չեմ ունեցել, բացարձակապես ծանոթ չեմ ոչ տվյալ նամակին, ոչ հեղինակին, ոչ թեմատիկային և միայն այսօր՝ ANCA-ի հայտարարությունից եմ իմացել այս թեմայի ու դրան իմ «մասնակցության» մասին։ Իրեն լուրջ կազմակերպություն համարող ANCA-ն գտնվել է գերանպատասխանատու, որ առանց կոմունիկացնելու և ճշտելու, պիտակավորել է մարդկանց, այս դեպքում՝ կոնկրետ ինձ։ Չգիտեմ՝ այս կազմակերպությունն ի՞նքն է ապատեղեկատվության աղբյուրը, թե՞ զոհը, սակայն այս վարկաբերկման ակցիան անպատիվ է՝ ցածր սոցիալական պատասխանատվության առհավատչյա։ Այդ լուրը տարածող բոլոր անձանց և ԶԼՄ-ներին հորդորում եմ զերծ մնալ այդ կեղծիքից և զրպարտությունից։

Հ.Գ. Այս կյանքում ANCA-ի անուն իմ զրույցներում հայտնվել է 2 անգամ։ Մեկը 2019թ., երբ Ֆլետչերում ուսանելիս այցելել ենք այդ կազմակերպության գրասենյակ, երկրորդը 2023թ., երբ ԱՄՆ աշխատանքային այցի ժամանակ մտածում էինք իրենց հետ նույնպես հանդիպելու մասին։ Այսքանը, մնացածը՝ ցնորամտություն է»։