Ավստրալիան հրթիռներ և հետախուզական ինքնաթիռ կուղարկի ԱՄԷ՝ իրանական գրոհներից պաշտպանվելու համար

Ավստրալիայի թագավորական ռազմաօդային ուժերը հետախուզական ինքնաթիռ և «օդ-օդ» դասի հրթիռների խմբաքանակ կուղարկեն Արաբական Միացյալ Էմիրություններ՝ Պարսից ծոցի օդային տարածությունը պաշտպանելու համար: «Արմենպրես»-ի փոխանցմամբ՝ այս մասին հայտարարել է Ավստրալիայի վարչապետ Էնթոնի Ալբանիզը։

«Իրանական հակամարտությունը Մերձավոր Արևելքում սկսվել է ավելի քան մեկ շաբաթ առաջ, և Իրանի պատասխան գրոհները շարունակում են թափ հավաքել՝ հասնելով արդեն աննախադեպ մասշտաբների։ Տարածաշրջանի տասներկու երկիր՝ Կիպրոսից մինչև Պարսից ծոց, շարունակում են ենթարկվել գրոհների», – ասել է նա մամուլի ասուլիսում, որը հեռարձակել է 9 News Australia հեռուստաալիքը։

Ալբանիզը նշել է, որ Ավստրալիայի թագավորական ռազմաօդային ուժերը E7A Wedgetail հետախուզական ինքնաթիռ, ժամանակակից «օդ-օդ» դասի միջին հեռահարության հրթիռներ, ինչպես նաև օժանդակ անձնակազմ կուղարկեն ԱՄԷ՝ էմիրությունների նախագահ Մուհամեդ բին Զայիդ ալ Նահյանի խնդրանքով, որի հետ նա հեռախոսազրույց է ունեցել։

Ալբանիզի խոսքով՝ Մերձավոր Արևելքում ապրում է 115 000 ավստրալացի, այդ թվում՝ 24 000-ն՝ ԱՄԷ-ում, և սա դարձել է ռազմական օգնության տրամադրումը պայմանավորող գլխավոր գործոններից մեկը։

«Ավստրալացիներին ցուցաբերվող օգնությունը նշանակում է նաև օգնություն Արաբական Միացյալ Էմիրություններին և Պարսից ծոցի մյուս երկրներին չհրահրված հարձակումներից պաշտպանվելու գործում», – ասել է նա՝ ընդգծելով, որ ռազմական օգնությունը բացառապես պաշտպանական բնույթ ունի։