Ոստիկանները հայտնաբերել և բերման են ենթարկել Ճվճվ Արոյի՝ հետախուզման մեջ գտնվող մյուս որդուն՝ Սերժ Վարդանյանին

«Ճվճվ Արո» անունով հայտնի Արա Վարդանյանի որդու՝ Սերժ Վարդանյանի նկատմամբ հունվարի 8-ին հետախուզում էր հայտարարվել։ Tert.am-ի տեղեկություններով Սերժ Վարդանյանն արդեն հայտնաբերվել է։ Տեղեկությունը Tert.am-ի հետ զրույցում հաստատեց ՀՀ ոստիկանության ԶԼՄ-ների հետ կապի, վերլուծության և լրատվության բաժնի պետ Էդգար Ջանոյանը. «Ոստիկանները հայտնաբերել են նշված քաղաքացուն և բերման ենթարկել»։ Նշենք, որ 2017 թվականի նոյեմբերի 26-ին «Աֆրիկյաններ» ռեստորանային համալիրում մի խումբ երիտասարդներ անհարգալից վերաբերմունք էին դրսևորել ռեստորանում գտնվող հաճախորդների նկատմամբ, ապա նաև բռնություն էին կիրառել, հայհոյել մատուցողին։ Նախքան այդ Սերժ Վարդանյանի մասնակցությամբ նաև կողոպուտի դեպք է գրանցվել։ Երկու դեպքով էլ հարուցված է քրեական գործ։ «Փաստինֆո»-ի փոխանցմամբ՝ Սերժ Վարդանյանին նախկինում առաջադրված մեղադրանքի ծավալը լրացնելու և փոփոխելու նպատակով վարույթն իրականացնող մարմինը ծանուցագրեր է ուղարկել նրան՝ ներկայանալու համար, սակայն Վարդանյանը չի ներկայացել։ Նման պայմաններում նրան բերման ենթարկելու որոշում է կայացվել: Այսպիսով, որոշում էր կայացվել Սերժ Վարդանյանին ՀՀ քրեական օրենսգրքի 176-րդ հոդվածի 1-ին մասով և 258-րդ հոդվածի 3-րդ մասի 1-ին կետով որպես մեղադրյալ ներգրավելու մասին, և դրա համար նրա նկատմամբ հետախուզում էր հայտարարվել: Հիշեցնենք, որ Երևանում երեկ տեղի ունեցած ավտովթարից հետո, որի հետևանքով 2 ոստիկան էր մահացել, ձերբակալվել էր «Ճվճվ Արոյի» մյուս որդին։