2017 թ.-ին բանակում մահացության դեպքերն ու հարուցված գործերը թվերի լեզվով

Հելսինկյան Քաղաքացիական Ասամբլեայի Վանաձորի գրասենյակը ներկայացնում է 2017թ. ընթացքում ՀՀ Զինված ուժերում եւ ԼՂՀ Պաշտպանության բանակում արձանագրված մահացության դեպքերի վերաբերյալ տեղեկանք: Ինչպես հայտնում են ՀՔԱՎ-ի մամուլի ծառայությունից, տեղեկանքում ներկայացված են 2017 թ.-ին զանգվածային լրատվամիջոցներով եւ պաշտոնական աղբյուրներով տարածված, ինչպես նաեւ մահացած զինծառայողների հարազատների կողմից տրամադրված տեղեկությունները: ՀՔԱ Վանաձորի գրասենյակի ուսումնասիրությունները ցույց են տվել, որ նշված ժամանակահատվածում արձանագրվել է մահացության 60 դեպք, 55-ով հարուցվել են քրեական գործեր: Դրանցից միայն 50-ի դեպքում է առաջնային տեղեկատվություն տարածվել պաշտոնական աղբյուրներով, 10 դեպքի մասին տեղեկություն է տարածվել նախ լրատվամիջոցներով, ապա 9 դեպքում տեղեկատվությունը հաստատվել է պաշտոնատար անձանց կողմից: 1 դեպք լուսաբանվել է միայն լրատվամիջոցներով: 2017-ին արձանագրված մահացության դեպքերի գերակշիռ մասը՝ 38 դեպք, արձանագրվել է Լեռնային Ղարաբաղում: Հրադադարի ռեժիմի խախտման հետեւանք են եղել արձանագրված դեպքերից 22-ը: 2016 թ.-ի համեմատ՝ 2017 թ.-ին հրադադարի ռեժիմի խախտման հետեւանքով մահվան դեպքերը նվազել են 13-ով, դժբախտ պատահարների հետեւանքով մահվան դեպքերը նվազել են 5-ով, սպանության դեպքերը նվազել են 5-ով, ինքնասպանության կամ ինքնասպանության հասցնելու պատճառով մահվան դեպքերը նվազել են 5-ով: Դրան հակառակ՝ 1-ով աճել է առողջական խնդիրների հետեւանքով մահվան դեպքերի թիվը: Վերջին 7 տարիների կտրվածքով ոչ հրադադարի ռեժիմի խախտման հետեւանքով մահացության դեպքերի թիվը նվազել է 2014 եւ 2015 թթ.-ին, իսկ 2016-ին ու 2017-ին կտրուկ աճել է: Վիճակագրական այլ տվյալներ եւ դեպքերի մանրամասն նկարագրությունները ներկայացված են տեղեկանքում: