Կառավարությունն իններորդ անգամ է փորձում վաճառել

Կառավարությունն իր այսօրվա՝ մարտի 5–ի նիստում պետական գույքը մասնավորեցնելու մասին որոշում կայացրեց։ Խոսքը Սևան համայնքի Գագարին գյուղի Գործարանային փողոց թիվ 4 հասցեում գտնվող 1106.68 քմ ընդհանուր մակերեսով շենք-շինությունների, դրանց օգտագործման ու սպասարկման համար հատկացված 1.95 հա մակերեսով հողամասի, ջրագծիը և տրանսֆորմատորի, որպես մեկ գույքային միավորի մասին է։ Այն կմասնավորեցվի դասական աճուրդով։

Նշված գույքը լուծարված «Գագարինի արտադրական բազա» ՓԲԸ-ի որպես լուծարումից հետո մնացած գույք է։

2025 թվականի հուլիսի 8-ի դրությամբ գույքի գնահատված շուկայական արժեքը կազմում է 73 մլն 866 հազար դրամ։

Նշված գույքը նախկինում 8 անգամ ներկայացվել է դասական աճուրդով մասնավորեցման, սակայն բոլոր 8 աճուրդները չեն կայացել՝ հայտ չլինելու պատճառով, ընդ որում՝ առաջին 6 աճուրդների դեպքում գույքի գնահատված շուկայական արժեքը կազմել է 83,1 մլն դրամ։

Նախագծի համաձայն՝ աճուրդում առաջարկած գնի 70 տոկոսն ուղղվելու է ՀՀ պետական բյուջե, 30 տոկոսը` համապատասխան համայնքի ֆոնդային բյուջե՝ ըստ գույքի գտնվելու վայրի, իսկ շարժական գույքի արժեքն ամբողջությամբ համապատասխան գանձապետական հաշվին։