Որտե՞ղ են հայ պաշտոնյաները դիմավորել այս Ամանորը
Հայ պաշտոնյաները Sputnik Արմենիային պատմել են, թե որտեղ և ում հետ են դիմավորել Նոր տարին։ Որտե՞ղ են անցկացնում Ամանորը հայ պաշտոնյաները։ Այս հարցը հանրությանը հետաքրքրում է նաև այն պատճառով, որ բոլորի համար պարզ է` պետական աշխատավարձով (նույնիսկ` պաշտոնյանի) Լաս Վեգասում, Բալիում կամ Ծաղկաձորի որոշ հյուրանոցներում Նոր տարի նշելն այնքան էլ հեշտ չէ։
Բայց մամուլը շարունակում է հետապնդել պաշտոնյաներին` փորձելով պարզել` ի վերջո որտեղ են իրականում նրանք անցկացնում տոնական արձակուրդն ու, ամենակարևորը, ինչ փողերով։ Մենք նույնպես փորձեցինք պարզել, թե որտեղ են անցկացնում իրենց տոնական հանգիստը մեր պաշտոնյաները։ Ֆինանսների, գյուղատնտեսության, սպորտի ու երիտասարդության, մշակույթի նախարարները Sputnik Արմենիայի հարցին ի պատասխան ասացին, որ Ամանորը դիմավորել են տանը` ընտանիքի հետ։ Առողջապահության նախարար Լևոն Ալթունյանը նշեց, որ ընտանիքի հետ Ամանորն անցկացրել է ամառանոցում։ Բնապահպանության նախարար Արծվիկ Մինասյանը նույնպես Նոր տարին դիմավորել է ընտանիքի հետ Երևանում։ Իսկ հունվարի 3-ին կմեկնի հայրական տուն` Թալինի շրջանի Ոսկեթաս գյուղ։ «Հայրական տանը հավաքվելու ենք եղբայրներիս ու քրոջս ընտանիքների հետ, ինչպես անում ենք ավանդաբար»,- ասաց Մինասյանը։
ՀՀԿ փոխնախագահ, ԱԺ պատգամավոր Արմեն Աշոտյանը նույնպես հայտնեց, որ Ամանորը դիմավորել է Երևանում, ինչպես ամեն տարի` բայց այս տարի մի փոքր տարբերությամբ։
«Այս տարի առաջին անգամ է, որ ոչ թե մենք ենք գնացել ծնողներիս տուն, այլ, մեր մեծ ընտանիքն է եկել մեր տուն։ Ծնողներս, քույրս, միասին ենք դիմավորել Նոր տարին»,- պատմեց Աշոտյանը։
Ու թեև պաշտոնյաներն ու պատգամավորները երբեք չեն խոստովանում, որ արձակուրդն անցկացնում են արտերկրի որևէ հայտնի հանգստավայրում, բայց մամուլը շարունակում է պնդել, որ հատկապես հայ պատգամավորներից շատերը նախընտրել են Ամանորը դիմավորել ամերիկյան Գլենդելի Ամերիկանա կոչվող տարածքում և շքեղ առանձնատներ են վարձել տոներն անցկացնելու համար։
Ի դեպ, տարիներ առաջ, Հայաստանից մեծ գումարների արտահոսքը կանխելու նպատակով վարչապետ Տիգրան Սարգսյանը կառավարության անդամներին արգելել էր արձակուրդներն անցկացնել Հայաստանից ու Արցախից բացի որևէ այլ վայրում։ Այդ պահից սկսած` հայ պաշտոնյաներն ավելի շատ են խուսափում խոստովանել, որ տոներին Հայաստանում չեն լինում։
Հետևեք մեզ Viber-ում
