Արտահերթ նիստ.օրակարգում Իրաքի եզդիների հարցն է

ԱԺ պաշտոնական կայքի տեղեկացմամբ,հունվարի 11-ին տեղի կունենա ԱԺ արտաքին հարաբերությունների մշտական հանձնաժողովի արտահերթ նիստը, որի ընթացքում քննարկման կդրվի «Ահաբեկչական խմբավորումների կողմից իրենց վերահսկողության ներքո գտնվող Իրաքի Հանրապետության տարածքներում եզդի ժողովրդի նկատմամբ ցեղասպան գործողությունների դատապարտման մասին» օրենքի նախագիծը,որի հեղինակներն են ՀՀԿ խմբակցության պատգամավորները՝ խմբակցության ղեկավար Վահրամ Բաղդասարյանը, արտաքին հարաբերությունների հանձնաժողովի նախագահ Արմեն Աշոտյանը եւ Ռուստամ Մախմուդյանը: Նախագծում, մասնավորապես, ասվում է, որ պետք է ճանաչել եւ խստորեն դատապարտել ահաբեկչական խմբավորումների կողմից Իրաքի Հանրապետության տարածքներում եզդի ժողովրդի նկատմամբ իրականացված ցեղասպան գործողությունները, նրանց նկատմամբ խոշտանգումներն ու անմարդկային, դաժան վերաբերմունքը, բռնի տեղահանումը, կանանց, աղջիկների եւ երեխաների նկատմամբ սեռական ոտնձգությունները, քաղաքացիական, կրթական, բժշկական եւ հասարակական նշանակություն ունեցող այլ օբյեկտների դիտավորյալ թիրախավորումը, կրոնական եւ պատմական նշանակություն ունեցող շինությունների ոչնչացումը: ՀՀ ԱԺ-ն միջազգային հանրությանը կոչ է անում միջազգային կառուցակարգերի միջոցով հետաքննել կատարված հանցագործությունները, հետապնդել եւ պատասխանատվության ենթարկել միջազգային հանցագործություններ կատարած անձանց, ինչպես նաեւ ձեռնարկել միջոցներ եզդի բնակչության անվտանգությունն ու պաշտպանությունը ապահովելու, նրանց մարդասիրական աջակցություն ցուցաբերելու համար: