Հնարավոր է` հայ-իրանական համատեղ զnրավարժություններ ապագայում ևս տեղի ունենան. ՀՀ-ում Իրանի դեսպան
Հնարավոր է` հայ-իրանական համատեղ զորավարժություններ ապագայում ևս տեղի ունենան և լինեն ավելի մասշտաբային։ Sputnik Արմենիայի հարցին ի պատասխան այս մասին ասաց ՀՀ–ում Իրանի Իսլամական Հանրապետության նորանշանակ արտակարգ և լիազոր դեսպան Խալիլ Շիրղոլամին, որն այսօր մասնակցում էր ԵՊՀ արևելագիտության ֆակուլտետի իրանագիտության ամբիոնի վարիչ, պրոֆեսոր Վարդան Ոսկանյանին «Պարսից լեզվի և գրականության ակադեմիայի պատվավոր անդամության» շնորհման արարողությանը:
Հայաստանի և Իրանի զինված ուժերի հատուկ նշանակության ստորաբաժանումները համատեղ զորավարժություն անցկացրին 2025 թ. ապրիլին։
«Հաշվի առնելով մեր երկու երկրների հարաբերություններն ու կապերը տարբեր ոլորտներում, այդ թվում` պաշտպանության ոլորտում, նմանօրինակ միջոցառումները ընթացիկ, առօրյա միջոցառումներ են, որոնք հնարավոր է` ապագայում ևս տեղի ունենան, և հնարավոր է` ապագայում ավելի մասշտաբային լինեն»,– ընդգծեց դեսպանը։
Մեր մյուս հարցին` արդյոք ՀՀ պաշտպանության նախարար Սուրեն Պապիկյանի այցը Իրան վաղո՞ւց էր պլանավորված, թե՞ այն կարելի է դիտարկել Իրանի հետ կապված լարվածության ֆոնին, դեսպան Շիրղոլամին պատասխանեց` այցը նախապես պլանավորված էր։
«Սա խոսում է երկու երկրների միջև տարբեր ոլորտներում ընթացող համագործակցության և կապերի մասին։ Այս այցի վերաբերյալ ևս երկու երկրների տարբեր պատվիրակությունների ձևաչափերի միջոցով պլանավորվել է։ Այս այցի ընթացքում կողմերը հնարավորություն կունենան կարծիքներ փոխանակելու տարբեր հարցերի վերաբերյալ և ավելի խորացնելու արդեն իսկ առկա համագործակցությունը»,– վստահեցրեց դեսպանը։
Նրա խոսքով` հայ–իրանական սահմանը մշտապես եղել է խաղաղության սահման և երկու երկրների համար շատ մեծ կարևորություն ունի։
«Երկու երկրների ռազմական ոլորտներն էլ հենց հիմնվում են այդ պատմական կապերի վրա և սահմանի անխզելիության, ինչպես նաև երկու երկրների տարածքային ամբողջականության պահպանման սկզբունքների հիման վրա»,– նշեց Շիրղոլամին։
Նա ավելացրեց, որ երկու երկրները բոլոր ոլորտներում` թե՛ ակադեմիական, թե՛ տնտեսական, թե՛ քաղաքական, թե՛ մշակութային, ճիշտ հունով են ընթանում և օրեցօր ավելի են զարգացնում այս ոլորտներում, ապագայում նոր նվաճումների վկան կլինենք։
Sputnik Արմենիայի հաջորդ հարցը վերաբերում էր այս տարվա հունվարին դեսպանի հնչեցրած կոշտ գնահատականներին, որոնք վերաբերում էին ՀՀ–ում Իրանի դեսպանատան մոտ անցկացված հակաիրանական ցույցերի վերաբերյալ և այդ լարվածության ֆոնին ՀՀ իշխանությունների հայտարարություններին` ՀՀ իշխանությունների հետագա գործողությունները փարատե՞լ են դեսպանի մտահոգությունները։
Դեսպանը շնորհակալություն հայտնեց ՀՀ պատկան մարմիններին, որ համապատասխան քայլերը ձեռնարկեցին այս իրավիճակում։
«Այն իրադարձություները, որոնց ականատեսը եղանք Իրանում, դրանք ի սկզբանե խաղաղ ցույցեր էին, որոնք արտասահմանից Իրան ներմուծված կազմակերպված խմբերը փորձեցին տանել այլ հունով և երկիրը ներքաշել ներքաղաքական պատերազմի մեջ։ Նմանօրինակ լոզունգներով` քաղաքական, իշխանափոխության, ցանկացած ակցիա քննադատելի են։ Այդ մարդիկ նույնպես մեր քաղաքացիներն են, նրանց էլ ենք մենք սիրում, և մենք վստահ ենք` մեր ընտանիքի ներսում ի հայտ եկած տարաձայնությունները պետք է լուծենք հենց ընտանիքի ներսում»,– ասաց Շիրղոլամին։
Հետևեք մեզ Viber-ում
