Ի՞նչ կարծիք ունի նախագահը Նիկոլ Փաշինյանի իրավասությունների վերաբերյալ. «Փաստ»

«Փաստ» օրաթերթը գրում է.

«Փաստ» թերթի տեղեկություններով, օրերս «Համահայկական ճակատ» կուսակցության ղեկավար Արսեն Վարդանյանը հարցում է ուղարկել ՀՀ նախագահ Վահագն Խաչատուրյանին:

Երեկ մենք դիմեցինք կուսակցության գրասենյակ՝ խնդրելով նշել, թե ինչ հարցեր են բարձրացվել ՀՀ նախագահի առջև, որը ՀՀ Սահմանադրությամբ «պետության գլուխն» է: Կուսակցությունից տեղեկացրեցին, որ իսկապես նման նամակ ուղարկվել է՝ խնդրելով պարզաբանել հետևյալ հարցերը՝ ՀՀ վարչապետը իրավունք ունի՞՝ ՀՀ անունից ստորագրել խաղաղության պայմանագիր, հրաման տալ մարտական հենակետերից զորքերի հետ քաշվելու վերաբերյալ, հանձնարարական տալ անձին կալանավորելու վերաբերյալ, վիրավորել ՀՀ քաղաքացուն, միջամտել կրոնական կազմակերպությունների գործունեությանը:

Նաև նշեցին, որ ՀՀ նախագահի աշխատակազմից ստացվել է պատասխան, որտեղ որևէ պարզաբանում չկա, այլ միայն օրենքների են հղումներ տալիս, օրինակ՝ Սահմանադրության 6-րդ հոդվածի 1-ին մաս, 17-րդ հոդված, 152-րդ հոդվածի 1-ին մաս, 162-րդ հոդված, Քրդատ օրենսգրքի 284-րդ հոդվածի 1-ին մասի 1-ին կետ: Փաստացի, նախագահը, չտալով որևէ մեկնաբանություն և հստակ պատասխան, ինչի մասին նրան հարց է տրվել, այդուամենայնիվ, գոնե հստակ շեշտել է Սահմանադրության 17-րդ հոդվածը, ըստ որի, ՀՀ-ն երաշխավորում է կրոնական կազմակերպությունների գործունեության ազատությունը. «Կրոնական կազմակերպություններն անջատ են պետությունից»: Հաջորդը վերաբերում է դատարաններին. հոդվածը, որին հղում է արել ՀՀ նախագահը, նշում է, որ «արդարադատության իրականացմանը որևէ միջամտություն արգելվում է»: