Կարևոր չէ, թե ով քանի մանդատ կստանա, այլ թե ինչ ներուժ կձևավորվի․ «Միասին» շարժումը վերջնական որոշում չունի ընտրություններին մասնակցության ձևաչափի շուրջ

«Միասին» շարժումը որոշում ունի մասնակցելու ընտրություններին։ Մենք այս պահին համագործակցում ենք «Առաջարկ Հայաստանին» նախաձեռնության հետ, սակայն դա դեռ չի նշանակում, որ վերջնական որոշում ունենք ընտրություններին մասնակցելու այս ձևաչափով։ Այս մասին «Փաստինֆո»-ի հետ զրույցում ասաց շարժման համակարգող Արամ Սարգսյանը։

«Մենք կարևորում ենք այն գաղափարը, որ անհրաժեշտ է հավաքական կազմ ձևավորել, որպեսզի իրականում միավորվի ներուժը, որովհետև խոսքը միայն այս թիմին իշխանությունից հեռացնելու մասին չէ, այլ նաև կառավարման համակարգ ձևավորելու մասին է։

Հիմա կարևորն այն չէ, թե ով ինչքան մանդատ կստանա, այլ այն, թե այդ համախմբման արդյունքում ինչպիսի ներուժ կձևավորվի։ Եթե այս ամենը այդպես շարունակվի և բանակցությունների արդյունքում գանք համաձայնության, ապա կհայտարարենք ձևաչափի վերաբերյալ։ Այս պահին ասել, որ վերջնական որոշում կա, ճիշտ չի լինի։

Ամեն դեպքում, եթե խոսքը «Նոյյան տապան» ձևավորելու մասին է, ապա դա լրիվ այլ սկզբունք է։ Կրկնեմ՝ ոչ թե մանդատն է գլխավորը, այլ այն, որ առաջին հերթին կարողանանք միավորել ուժերը։

Մենք առաջարկում ենք ստորագրել երեք կետից բաղկացած հուշագիր, որով բոլոր ընդդիմադիր ուժերը կգան համաձայնության առանցքային հարցերի շուրջ։ Առաջիկայում կհրապարակենք այդ կետերը, որից հետո պարզ կլինի, թե ովքեր կկարողանան ապագայում ձևավորել կոալիցիա կամ այն քաղաքական միավորումը, որը կարող է պատասխանատվություն վերցնել կառավարման համակարգի համար։

Սա շատ ավելի բարդ և խորքային հարց է, քան այն, թե ով քանի մանդատ կամ ինչ պաշտոն կունենա։ Այստեղ դրված է ամենագլխավոր հարցը՝ այս իշխանությունը մնալո՞ւ է, թե՞ չի մնալու։ Եթե մնալու է, ապա ի՞նչ նշանակություն ունի, թե քանի մանդատ ես ունենալու։ Եթե գլխավոր հարցը չլուծվի, մնացյալը անիմաստ կլինի»։

Նա ընդգծեց, որ ակնհայտ է, որ ոչ մի առանձին քաղաքական միավոր չի կարող ապահովել 50+1 ձայն։ «Այս պայմաններում միանշանակ պահանջվում է ընդդիմադիր ուժերի կոալիցիոն իշխանության ձևավորում»։