Վալոդյա Գրիգորյանի հոր նամակը՝ դատավորին․ «Հոգեբանական ցավ եմ զգում, թույլ տվեք չմասնակցել դատական նիստերին»

Փարաքար խոշորացված համայնքի ղեկավար Վալոդյա Գրիգորյանի սպանության գործով դատավոր Մուժեղ Արամյանն այսօրվա՝ փետրվարի 20–ի դատական նիստում հայտարարեց, որ դիմում է ստացվել Վալոդյա Գրիգորյանի հորից՝ Լևոն Գրիգորյանից, ով գործով հանդիսանում է որպես տուժող։

Վերջինս իր դիմումում գրել է. «Նկատի ունենալով, որ քրեական գործի քննության ընթացքում քննարկման առարկա է դառնալու որդուս՝ Վալոդյա Գրիգորյանի սպանության հանգամանքները, դատական նիստերում ներկա գտնվելը ինձ պատճառում է հոգեբանական ցավ։ Դրանով պայմանավորված, խնդրում եմ իմ բացակայությունը համարել հարգելի և նիստերն անցկացնել իմ բացակայությամբ։

Միաժամանակ խնդրում եմ թույլատրել փաստաբանների պալատի փաստաբան Մխիթար Տիգրանյանին քրեական գործով հանդես գալ որպես իմ՝ տուժողի ներկայացուցիչ»։

Այս առնչությամբ դատավորն ասաց. «Լևոն Գրիգորյանի կողմից դատական նիստերին ներկա գտնվելը մինչև այն պահը, քանի դատարանը չդիտարկի այդ պարտականություն ներկայանալու իմաստով, դիտարկվում է իրավունքի իրացման համատեքստում և խոչընդոտ չի դիտարկվում վերջինիս դատական նիստերին չմասնակցելը»։

Հիշեցնենք, որ սեպտեմբերի 23-ին՝ ժամը 23։52-ի սահմաններում, Մերձավան բնակավայրի Երևանյան խճուղում՝ իր նորակառույց տան մոտ սպանվել է Փարաքարի համայնքապետ Վալոդյա Գրիգորյանը։ Նրա հետ միասին սպանվել է քրեական ոստիկանության ծառայող Կարեն Աբրահամյանը, որը Գրիգորյանի ընկերն է ու դեպքի պահին նրա հետ է եղել՝ ոչ ծառայության հետ կապված։ Վիրավորում ստացած քաղաքացին, որը ծայրահեղ ծանր վիճակում էր գտնվում, Արծրուն Գալստյանն է։ Սպանություն կատարած անձը եղել է դիմակավորված և ձեռնոցներով, մոտեցել է տան մոտ կանգնած Գրիգորյանին և նրա ընկերներին, դիմահար կրակահերթ արձակել։

Դեպքի առթիվ Արմավիրի մարզային քննչական վարչության Վաղարշապատի քննչական բաժնում ՀՀ քրեական օրենսգրքի 155-րդ հոդվածի 1-ին մասի (2 դրվագ) (սպանություն), 44-155-րդ հոդվածի 1-ին մասի (սպանության փորձ) և 335-րդ հոդվածի 1-ին մասի (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) հատկանիշներով նախաձեռնվել է քրեական վարույթ։ Այս գործով այժմ երկու մեղադրյալ կա՝ 31-ամյա Նարեկ Օհանյանը և 20-ամյա Գևորգ Հարությունյանը, նրանք երկուսն էլ կալանքի տակ են։

NEWS.am