Ով է սրբազանին խնամում և ինչ են խնդրել գյումրեցիներին

Երեկ Շիրակի թեմի առաջնորդ Միքայել Սրբազանը դուրս գրվեց Երևանի Իզմիրլյան բժշկական կենտրոնից և վերադարձավ Գյումրի։ Գյումրիում նրան  դիմավորեցին մեծ ոգևորությամբ․ հազարավոր հավատացյալներ ու գյումրեցիներ հավաքվել էին առաջնորդարանի բակում՝ պաստառներով սպասելով Սրբազանին։ 

Նշենք, որ Սրբազանի փաստաբանական թիմը միջնորդություն է ներկայացրել, և հաջորդ դատական նիստին որոշում կկայացվի՝ Սրբազանի նկատմամբ արգելքը հանվելու է թե ոչ, և նա պատարագներին կկարողանա մասնակցե՞լ, թե՞ ոչ։
Ուշագրավ է, որ Սրբազանն ապրում է Շիրակի առաջնորդարանում, որը երկհարկանի է, և այս պահին Սրբազանին երկրորդ հարկից անգամ առաջին հարկ իջնելու հնարավորություն չի տրվում, քանի որ հսկող սարքը նրա ոտքին է ամրացված և կարող է  տեղաշարժի հետ կապված խնդիր լինել։  Տեղեկացանք, որ այս պահին  դատարանի որոշմամբ Սրբազանին կարող է խնամել, նրա մոտ ելք ում մուտք անել  միայն եղբոր որդին՝ Գրիգոր Աջապահյանը։

Ի դեպ երեկ Սրբազանի պաշտպան Մարինե Ֆարմանյանն էլ իր հերթին գյումրեցիներին խնդրեց` այս օրերին Սրբազանի հետ հանդիպում չփնտրեն, շփում չունենան, որպեսզի որևէ իրավական խախտում չգրանցվի։ Գյումրեցիներն ըմբռնումով մոտեցան և միայն քաջառողջություն մաղթելով Սրբազանին` առաջնորդարանի մուտք ուղեկցեցին նրան։

 «Հրապարակ օրաթերթ»