Ո՞րտեղ են արցախցիների գումարները, «Արցախբանկի» Արտա՛կ, բարենպաստ պայմաններ են, հա՞, ՀՀ-ում

«Արցախբանկի» ղեկավարության համար ՀՀ-ում բարենպաստ միջավայր է ստեղծված, արցախցիների հետ չեն ուզում հանդիպել: 24News-ի հետ զրույցում նման կարծիք հայտնեց Արցախի պետնախարար Նժդեհ Իսկանդարյանը և հիշեցրեց, որ բանկի բաժնետոմսերի գրեթե կեսը՝ մոտ 26 մլրդ դրամ, պատկանում է Արցախի կառավարությանը՝ ներդրումային հիմնադրամին, որը, սակայն, դրանք կառավարելու հնարավորություն չունի:

«Եթե «Արցախբանկի» տնօրեն Արտակ Բալայանը շարունակի խուսափել ինձ հետ հանդիպումներից, բացահայտումներ եմ անելու: Բանկն այսօր էլ աշխատում ու շահույթ է ստանում, թույլ չի տալիս, որևէ կերպ մենք մասնակցենք ակտիվների կառավարմանը, ներդրումային հիմնադրամի տնօրենի հետ ևս չեն հանդիպում»:

Նժդեհ Իսկանդարյանը նշեց, որ Արցախի կառավարության ակտիվները եթե վաճառելու հնարավորություն ունենան, կլուծեն պատերազմում զոհվածների ու պայթյունից տուժած ընտանիքների սոցիալական մի շարք խնդիներ:

«Եթե «Արցախբանկի» Արտակը բոլոր հարցերի պատասխաններն ունի, ի՞նչն է խնդիրը, որ չի համաձայնվում հանդիպենք, քննարկենք, ինքը պիտի շահագրգիռ կողմ լինի, արցախցին պիտի իմանա՝ ուր են իրեն պատկանող միջոցները»:

Մեր հարցին, թե արցախցի է՞լ որ պաշտոնյաններն են, որ խուսափում են իրենց հայրենակիցների հետ հանդիպումից, Նժդեհ Իսկանդարյանը պատասխանեց. «Բացահայտումները թողեք ինձ, բայց սա թող որոշ արցախցի պաշտոնյաների համար զգուշացում լինի»:

Հասմիկ Կիրակոսյան