«Բացահայտված» է այն, ինչը մտահոգում էր իշխանությանը

ՀՀ ընտրական նոր օրենսգրքի նախագիծը Սերժ Սարգսյանի նախանշած ժամկետից մեկ օր ուշացումով հրապարակվեց եւ այն էլ Վենետիկի հանձնաժողովի կայքում՝ անգլերեն տարբերակով:Մինչդեռ Սերժ Սարգսյանի կողմից դեռևս փետրվարի 10-ին ստորագրված «Սահմանադրական բարեփոխումների իրավական ապահովման գործընթացի կազմակերպման մասին» անվանումով հրամանագրի համաձայն՝ նոր ԸՕ նախագիծը պետք է խորհրդարան ուղարկվեր մինչև այս տարվա մարտի 1-ը: Հանրապետականներն անհիմն ու անհասկանալի բացատրություններ են ներկայացնում նախագծի ուշացման վերաբերյալ»: Ազգային ժողովի պետաիրավական հարցերի մշտական հանձնաժողովի նախագահ Հովհաննես Սահակյանը, մասնավորապես, պարզաբանել է, որ կառավարության հեղինակած նախագիծը նախ պետք է հաստատի գործադիրը․ «Առաջիկա նիստը, կարծես թե, մարտի 3-ին է: Ամենայն հավանականությամբ, այդ նիստով կհաստատվի և կգա Ազգային ժողով: Մեկ-երկու օրը․․․ պարզ է, հրամանագիր է, բայց նաև հաշվի առնենք, որ կառավարության նիստը ամսի 3-ին է» ասել է Սահակյանը: Այդուհանդերձ, խոսքը ՀՀ նախագահի հրամանագրի մասին է, ոչ թե սովորական մի դիմումի ու առնվազն տարակուսելի է, որ նախագահի աշխատակազմը հաշվի չի առել այդ նրբությունները: Իրականում մամուլում տեղեկություններ կան, որ ՀՀ իշխանությունները սպասում են Վենետիկի հանձնաժողովի գնահահատականին, որպեսզի հասկանան, թե իրենց ցանկությունները անցնելու շանս ունեն, թե ոչ: Այն տարբերակները, որոնցով հնարավոր կլինի ընտրությունների ելքը վերահսկել, հնարավոր է չընդունվեն Վենետիկի կողմից: Այս կառույցի գնահատականը դեռեւս պարզ չէ, սակայն նրանց կողմից «բացահայտված» է նախագծի բովանդակությունը, իհարկե, անգլերեն տարբերակով: Չի բացառվում, որ եվրոպական գործընկերներն այս «բացահայտումով» փորձեն ստուգել հայաստանյան տրամադրությունները եւ լսել ընդդիմադիրների գնահատականները, որոնցից կախված էլ կլինի վերջնական գնահատականը: Ամենայն հավանականությամբ,  նախագիծը վաղը տեղի ունենալիք կառավարության նսիտից հետո կուղարկվի Ազգային ժողով, այս մասին ակնարկել է ՀՀԿ խմբակցության ղեկավար Վահրամ Բաղդասարյանը: Ապա կսկսվեն լայնամասշտաբ քննարկումներ:Մինչ այդ «Իրազեկ քաղաքացիների միավորումը» արդեն հասցրել եւ ուսումնասիրել է երեկ ուշ երեկոյան Վենետիկի հանձնաժողովի կայքում հայտնված նախագծի անգլերեն տեքստը և առանձնացրել առավել հետաքրքիր նորամուծությունները, որոնցից հասկանալի է դառնում շատ բան: Օրինակ , յուրաքանչյուր ընտրական տեղամասում միաժամանակ գտնվող տեղացի դիտորդների ու ԶԼՄ ներկայացուցիչների ընդհանուր թիվը սահամանափակվել է 8-ով: «Այժմ ոչ միայն միջազգային, այլև տեղական դիտորդական կազմակերպություննները կարող են մասնակցել ընտրություններին բացառապես ՀՀ նախագահի, վարչապետի, Աժ նախագահի կամ ԿԸՀ-ի հրավերի առկայության դեպքում:  Այսինքն, նման հրավեր չունեցող կազմակերպությունները դիտորդությամբ չեն կարող զբաղվել»: Այսինքն՝ հաջորդ ընտրություններին լինելու են միայն «իշխանական» դիտորդներ ու կատարելու իշխանահաճո արձանագրումներ: Նոր նախագծում քվեարկության հետեւյալ կարգն է ամրագրված,«Ընտրողների գրանցումը կատարվելու է էլեկտրոնային համակարգի միջոցով, որով տեղամասում գտնվող հատուկ տեխնիկական մասնագետը գրանցելու է ընտրողներին: Ընտրողները կկարողանան գրանցվել թե սովորական անձնագրերով, թե բիոմետրիկ անձնագրերով և թե նույնականացման քարտերով:Համակարգը ճշտելու է, թե արդյո՞ք քաղաքացին ընդգրկված է ընտրողների ցուցակում և արդյո՞ք չի քվեարկել: Բացի այդ, եթե քաղաքացին քվեարկում է բիոմետրիկ անձնագրով կամ ID քարտով, ապա համակարգչի էկրանին կերևա ընտրողի նկարը»: Բոլոր տեսակի անձը հաստատող փաստաղթերով ընտրություններին մասնակցելու հնարավորությունն արդեն մեծացնում է խախտումների ռիսկայնությունը: 41 ընտրատարածքների փոխարեն այժմ լինելու են 13 ընտրական տարածքներ՝ 4-ը Երևանում, 9-ը մարզերում (Վայոց Ձորն ու Սյունիքը մեկ տարածք են կազմելու): Բացի Երևանից, այժմ նաև Գյումրիի և Վանաձորի ավագանիները ևս կընտրվեն համամասնական ընտրակարգով, իսկ քաղաքապետերը կընտրվեն արդեն ավագանու կողմից: Մյուս համայնքների մասով էական փոփոխություն չկան: Անի Սահակյան