ՄԱԿ-ի գլխավոր քարտուղարը դատապարտել է Իսրայելի որոշումը Արևմտյան ափի հողերի գրանցման ընթացակարգեր սկսելու վերաբերյալ
ՄԱԿ-ի գլխավոր քարտուղար Անտոնիու Գուտերեշը դատապարտել է Իսրայելի որոշումը՝ օկուպացված Արևմտյան ափի տարածքները որպես պետական սեփականություն դասակարգելու վերաբերյալ։ Այս մասին Գուտերեշը նշել է X միկրոբլոգում գրառման մեջ։
«Ես դատապարտում եմ Իսրայելի կառավարության որոշումը՝ վերսկսելու հողերի գրանցման ընթացակարգերն օկուպացված Արևմտյան ափում: Որոշումը կարող է հանգեցնել պաղեստինցիներին սեփականությունից զրկելուն և սպառնում է ընդլայնել Իսրայելի անօրինական վերահսկողությունն այդ տարածքում գտնվող հողերի նկատմամբ», – նշել է նա։
Կոչ անելով Իսրայելին անհապաղ չեղարկել այս միջոցառումները՝ Գուտերեշը զգուշացրել է, որ նմանատիպ քայլերը խաթարում են երկու պետության բանաձևով կարգավորումը։
«Ես կոչ եմ անում Իսրայելին չեղարկել այս միջոցառումները և բոլոր կողմերին՝ պահպանել երկարատև խաղաղության միակ ուղին՝ բանակցությունների միջոցով երկու պետության բանաձևով կարգավորումը՝ միջազգային իրավունքին համապատասխան», – եզրափակել է նա։
Ավելի վաղ Իսրայելի կառավարությունը հաստատել է ֆինանսների նախարար Բեզալել Սմոտրիչի, արդարադատության նախարար Յարիվ Լևինի և պաշտպանության նախարար Իսրայել Կացի առաջարկն Արևմտյան ափի հողերի գրանցման գործընթաց սկսելու վերաբերյալ։
Սա 1967 թվականից ի վեր առաջին նման որոշումն է, որը նպատակ ունի լուծել Արևմտյան ափում հողերի սեփականության վեճերը։ Որոշման հիման վրա Իսրայելի արդարադատության նախարարության հողային գրանցամատյանի մարմինը կստանա լրացուցիչ ֆինանսավորում, լիազորություններ և անձնակազմ՝ պետական գրանցամատյանում հողամասերի գրանցման գործընթացը կազմակերպելու համար։
Պաղեստինյան կողմն այս միջոցառումները դիտարկում է որպես Արևմտյան ափի պաշտոնական անեքսիա, որը կխաթարի ՄԱԿ-ի կողմից հավանության արժանացած երկու պետության բանաձևով կարգավորումը։
Հետևեք մեզ Viber-ում
