ՔՊ պատգամավորը հանուն փիարի ոտնատակ է տալիս պետական գաղտնիքը
ՔՊ-ական պատգամավոր Արտյոմ Մեհրաբյանը ֆեյսբուքյան իր էջում գրառում է կատարել՝ հրապարակելով զենքի լուսանկարներ և նշելով, որ դրանք հայկական արտադրության են։
Oragir.News-ը ուսումնասիրել է հրապարակված լուսանկարները, ինչի արդյունքում պարզվել է, որ զենքը արտադրվում է Maktes Arms ընկերության կողմից, որը զբաղվում է ռազմական և քաղաքացիական նշանակության զենքերի արտադրությամբ։
Ռազմական նշանակության զենքի վերաբերյալ բաց աղբյուրներից պարզ է դարձել, որ Maktes Arms ընկերության T-AB 1A բուլփափ տեսակի մոդուլային ինքնաձիգը նախագծված է էլիտար զինվորական և իրավապահ ստորաբաժանումների պահանջներին համապատասխան։
Փոխվող փողի և պահեստատուփի ընդունիչի շնորհիվ այն կարող է հեշտությամբ ձևափոխվել՝ կրակելու 5.56×45 NATO, 5.45×39, 7.62×39 կամ այլ միջանկյալ փամփուշտներով՝ օգտագործելով ինչպես ստանդարտ AK, այնպես էլ STANAG տեսակի պահեստատուփեր։
Այս համատեքստում առավել հետաքրքիր էր պարզել, թե արդյոք նման զենքերն օգտագործվում են Հայաստանի ռազմարդյունաբերության և զինված ուժերի շրջանակում։
Ռազմաքաղաքական փորձագետ Մհեր Հակոբյանը Oragir.News-ի հետ զրույցում նշեց, որ նման թեմաները, որոնք կարող են պարունակել ռազմական գաղտնիք, չպետք է մեկնաբանվեն։
Հարցին, թե արդյոք տվյալ զենքերը կիրառվում են Հայաստանի Հանրապետությունում, փորձագետը պատասխանեց․ «Դա ռազմական և պետական գաղտնիք է։ Ոչ պատգամավորները, ոչ էլ պաշտպանության նախարարության աշխատակիցները չպետք է նման տեղեկատվությունը դարձնեն հասարակության համար հասանելի։
Նորմալ երկրներում ռազմարդյունաբերությանը վերաբերող հարցերն ու խնդիրները մնում են պետական գաղտնիք և չեն բարձրաձայնվում»։
Հետևեք մեզ Viber-ում
