Հովիկ Աբրահամյանի նկատմամբ ընտրված խափանման միջոց գրավը մնաց անփոփոխ

Հակակոռուպցիոն դատարանը՝ դատավոր Արամ Գրիգորյանի նախագահությամբ, անփոփոխ է թողել Հովիկ Աբրահամյանի նկատմամբ ընտրված խափանման միջոց գրավը։

Աբրահամյանի նկատմամբ որպես խափանման միջոց էր կիրառվել գրավը՝ 25 մլն դրամի չափով՝ համակցված վարչական հսկողությամբ և բացակայելու արգելքով։ Ի դեպ, հանրային մեղադրողները Վերաքննիչ դատարան հատուկ վերանայման բողոք են ներկայացրել՝ պահանջելով Աբրահամյանի նկատմամբ որպես խափանման միջոց կիրառել կալանքը։ Բողոքը մակագրվել է Անի Մարտիրոսյանին։ «Փաստինֆո»-ի հաղորդմամբ՝ այսօրվա նիստում Հակակոռուպցիոն դատարանը փոխել է մեղադրյալներից Բագրատունի Բարսեղյանի խափանման միջոցը՝ կիրառելով գրավը՝ 7 մլն դրամի չափով։

Հովիկ Աբրահամյանը, հիշեցնենք, մեղադրվում է փողերի լվացման, պաշտոնեական լիազորությունները չարաշահելու և ապօրինի ձեռնարկատիրական գործունեություն իրականացնելու մեջ։ Ըստ քրեական գործի՝ Հովիկ Աբրահամյանը «Քաղաքացիական ծառայության մասին» և «Հանրային ծառայության մասին» ՀՀ օրենքներով սահմանված՝ ձեռնարկատիրական գործունեություն իրականացնելու արգելքին հակառակ, ինչպես անձամբ, այնպես էլ իր վստահված անձանց, այդ թվում՝ Հենրիկ Աբրահամյանի միջոցով մասնակցել է «Արտաշատ-Վինկոն» ՓԲ ընկերության կառավարմանը՝ մինչև իր պաշտոնավարումների դադարեցումը՝ 2016 թվականի սեպտեմբերի 8-ը, հովանավորելով կազմակերպությանը, ինչը, ի թիվս այլնի, դրսևորվել է պաշտոնեական լիազորությունների չարաշահմամբ տեղական ինքնակառավարման մարմիններից շուկայականից էապես էժան գներով կեղծ աճուրդներով անշարժ գույք ձեռք բերելով և նշված առևտրային կազմակերպությանը տրամադրելով: Նշենք, որ Հովիկ Աբրահամյանի դրվագն ավելի վաղ էր ուղարկվել դատարան, հունվարին դատարան է ուղարկվել նաև Բագրատունի Բարսեղյանի և Գրիգոր Գևորգյանի մասը և այժմ գործերը քննվում են մեկ վարույթում։