Պարզվեց՝ ասֆալտն էլ միֆ է․ «Հրապարակ»
«Հրապարակ»-ը գրում է․ Երեւանում եւ ողջ հանրապետությունում այս իշխանության միակ «ձեռքբերումը»` ասֆալտը, խայտառակ վիճակում է հայտնվել․ ճանապարհներն այնպես են քանդվել, որ առաջացել են մեծ ու խորը փոսեր, որոնք վտանգ են ներկայացնում թե՛ վարորդների, թե՛ հետիոտների համար։ Այդ փոսերը ե՛ւ կենտրոնական փողոցներում են, ե՛ւ երկրորդային ու բակային հատվածներում։ Վարորդները պնդում են, որ ձյան դեմ պայքարում ինչ-որ քիմիկատներ են շաղ տվել, դա է այս ավերածությունների պատճառը։
«Ունենք մեծ ծավալի փոսալցման աշխատանքներ: Շաբաթ եւ կիրակի օրերին կսկսվեն բուն փոսալցման աշխատանքները»,- անդրադառնալով թեմային՝ հայտարարել է Տիգրան Ավինյանը: Նրա խոսքով` ասֆալտի քայքայումը պայմանավորված է նրանով, որ ձյունը հալեցնելու նպատակով փողոցներում աղ շատ են լցրել: Բայց ամեն տարի էլ աղ լցնում են, սակայն դրանից ասֆալտն այսքան արագությամբ չէր քայքայվում, ուրեմն այն անորակ է եղել ի սկզբանե, եւ ձյան ու սառույցի դեմ պայքարն էլ անգրագետ ձեւով են արել:
Երեւանի ավագանու «Մայր Հայաստան» խմբակցության ղեկավար Մանուկ Սուքիասյանը, «Հրապարակի» հետ զրույցում անդրադառնալով թեմային, նկատում է. «Ասֆալտը դարձրել էին մատի փաթաթան` էսքան կիլոմետր ասֆալտ ենք արել, էնքան կիլոմետր ասֆալտ ենք արել, բայց եթե մի հատ ձյուն պիտի գա, ու աղից ասֆալտը դառնա զրո, քայքայվի գնա, նշանակում է, որ այն անորակ է: Սակայն, ինչպես դասականն է ասում, ասֆալտն ասֆալտ է: Աղի, ավազի, մյուսների հետ կապված հարցեր առաջանալուց առաջ, նախ, պետք էր համապատասխան չինովնիկների հետ զրուցել, սակայն քանի որ դա էլ չի արվել, կարող էին այս օրերին այդ փոսերը լցնել: Այդ հարցը վաղուց պետք է լուծած լինեին, քանի որ ոչինչ չեն արել, եւ կա հանրային մեծ դժգոհություն, գործակարգավարական նիստի ժամանակ Ավինյանը որոշեց անդրադառնալ թեմային, ինչպես միշտ` բոլորը մեղավոր են, բացի իրենցից: Անպատասխանատու կառավարման հետեւանքների հետ գործ ունենք: Միջին վիճակագրական ՔՊ-ականի մոտեցում է սա: ԱՆԻՖ-ի փողերը, որ մսխեցին, այդտեղ է՞լ էր աղը մեղավոր: Կկվի բնից որ վատ հոտ է գալիս, ուրիշներից է հոտ առնում: Կառավարումը տապալված է, եթե այսպես շարունակվի, ամբողջ քաղաքի ասֆալտն է քայքայվելու: Չի բացառվում նաեւ, որ չափից շատ են աղ եւ ավազ լցրել, սակայն մի բան հստակ է, որ հատկապես բակային տարածքներում խայտառակ սառցակալած վիճակ էր, ոչինչ չարվեց, բանը հասավ նրան, որ եղանակը տաքացավ, ու արեւը հալեցրեց սառույցը: Ամեն բան թողել են իրավիճակին, իրենց ապիկարությունն ու դեմագոգությունը բարդում են այլոց վրա, արդեն՝ նաեւ երեւույթների: Ռիսկերի գնահատում գոյություն ունի, եւ դժվար չէ ենթադրել, որ ամեն տարի ձմռանը Հայաստանում կարող է ձյուն տեղալ, ինչի համար համապատասխան կանխարգելիչ աշխատանքներ են հարկավոր: Բայց, ինչպես տեսնում ենք, այս մարդկանց գործը միայն «Էրեբունի-Երեւան», ֆեստիվառներ, փառատոներ կազմակերպելն է, միլիարդներ վատնելը, տոնածառի համար ամեն տարի միլիոններ են ծախսում` 20 օրվա համար, գործուղումներ, վայելքներ. այս հարցերում չեմպիոններ են, սակայն ինչ վերաբերում է բուն գործառույթներին, տկար են, ոչինչ չեն կարողանում անել եւ, որ ամենահետաքրքիրն է` փաշինյանական ոճով չես հասկանում, թե ումից են դժգոհում, ում վրա են մուննաթ գալիս: Տպավորություն է, որ իրենք իրենց ընդդիմախոսներն են»:
Հետևեք մեզ Viber-ում
