«Հայփոստ»-ի ավտոմեքենայից գողություն կատարող Գարիկ Հակոբյանը ձերբակալվել է

Հունվարի 4-ին՝ ժամը 11.20-ին, ոստիկանության Արտաշատի բաժնում հաղորդում է ստացվել, որ Շահումյան գյուղում «Հայփոստ»-ի ավտոմեքենայից գողացել են չորս գյուղերի համար նախատեսված թոշակների գումարի պարկերը: Այս մասին հայտնում է ՀՀ ոստիկանությունը: Մեկնած օպերատիվ խումբը պարզել է, որ նույն օրը՝ ժամը 11.10-ի սահմաններում, Շահումյան գյուղի «Հայփոստ» ՓԲԸ մասնաճյուղի շենքի դիմաց օգտվելով «Հայփոստ»-ի՝ «ՎԱԶ-2101» մակնիշի ավտոմեքենայի վարորդի բացակայությունից և ավտոմեքենայի դուռը բաց լինելու հանգամանքից` սրահից գողացել են թվով կենսաթոշակների գումարի 17 պարկերից 6-ը, որոնց մեջ եղել է մոտ 12.620.000 դրամ գումար: Փաստի առթիվ հարուցվել է քրեական գործ ՀՀ քրեական օրենսգրքի 177-րդ հոդվածի 3-րդ մասի 1-ին կետի հատկանիշներով: Ոստիկանության ՔՀԳՎ, ԿՀԴՊ ԳՎ, Արարատի մարզային վարչության և բաժնի ծառայողների կողմից ձեռնարկված անհետաձգելի օպերատիվ-հետախուզական միջոցառումների շնորհիվ պարզվել է, որ նշված հանցագործությունը կատարել է 1987 թ. ծնված Գարիկ Հակոբյանը: Վերջինս տվել է խոստովանական ցուցմունք: Գողացված գումարից հայտնաբերվել է 5.128.800 դրամը: Ձեռնարկվում են միջոցառումներ գողոնի մյուս մասը հայտնաբերելու ուղղությամբ: Գ. Հակոբյանը ձերբակալվել է: Կատարվում է նախաքննություն: