Հորեղբոր հայհոյանքից հետո կոտրել էր նրա մատները, գլուխը, ապա հրկիզել

2023 թվականի հունվարի 8-ին Կապանի տներից մեկում սովորական հավաքույթն ընտանիքի համար վերածվեց ողբերգության:

Ռուսաստանի Դաշնության կողմից հետախուզվող Մհեր Դ.-ն, ով Հայաստան էր եկել դեպքից մի քանի ամիս առաջ, հոր հետ այցելում է հորեղբոր տուն, որտեղ էլ իր ու իր հոր հասցեին հնչած սեռական բնույթի հայհոյանքի համար նախ կոտրում է հորեղբոր՝ Սամվել Դ.-ի ձախ ձեռքի մատները, ապա տանը եղած տարբեր առարկաներով բազմիցս հարվածում նրա գլխին ու մարմնի տարբեր մասերին, և երբ արդեն հորեղբայրը մահամերձ վիճակում է լինում, նրան պառկեցնում է փակ պատշգամբի մահճակալին ու լաթի կտորներով վառում մահճակալը՝ փորձելով թաքցնել բոլոր հետքերը:

Իր ցուցմունքում Մհեր Դ.-ն նշել էր, որ չի ցանկացել սպանել հորեղբորը և երբ անկողինն այրելիս լսել է նրա ձայներն ու հասկացել, որ նա ողջ է, մարել է կրակն ու շտապօգնություն կանչել, որպեսզի փրկեն հորեղբորը: Մհեր Դ.-ն հետագայում տված իր ցուցմունքներում ընդունել է, որ հորեղբայրը մահացել է իր հարվածներից, բայց չի ընդունում, որ նրան սպանել է առանձնակի դաժանությամբ:

Դիակի դատաբժշկական փորձաքննությունը ցույց է տվել, որ Սամվել Դ.-ն մահացել է գլխի վնասվածքներից՝ բաց, բութ գանգուղեղային վնասվածք ստանալու հետևանքով: Մարմնի վրա եղել են նաև այրվածքներ: Իսկ Մհեր Դ.-ն չի տառապել հոգեկան հիվանդությամբ, ընդունակ է եղել գիտակցել իր արարքների վտանգավորությունն ու կառավարել դրանք և չի եղել աֆեկտի վիճակում:

Ըստ փորձաքննության արդյունքների՝ Մհեր Դ.-ն սպանությունը կատարելու պահին եղել է խմած: Նրան ճանաչել են մեղսունակ ու դատապարտել 15 տարվա ազատազրկման:

Աղբյուրը՝ DataLex