12 մլն 620 հազար դրամ.մանրամասներ թոշակառուների թոշակի գումարի հափշտակությունից

Այսօր՝ հունվարի 4-ին, առանձնապես խոշոր չափի գողության դեպք է տեղի ունեցել Արարատի մարզում։ Անհայտ անձը ժամը 11։20-ի սահմաններում Շահումյան գյուղում «Հայփոստ»-ի ավտոմեքենայից հափշտակել է մի քանի գյուղերի թոշակառուների համար նախատեսված թոշակների գումարի պարկերը։ Ինչպես հայտնում է ֆոտոլրագրող Գագիկ Շամշյանը, պարզվել է, որ գումարը կազմում է մոտ 12 մլն 620 հազար դրամ։ Մինչ Արարատի մարզի Ոստիկանության պետ, «մեծն» Սևան Քոչարյանը և Ոստիկանության Արտաշատի բաժնի պետ, «մեծն» Արթուր Հովհաննիսյանը ամանորյա կերուխումով էին տարված, չբարեհաճելով ժամանել դեպքի վայր, ինչը նրանց մոտ կարծես ավանդույթ է դարձել, Ոստիկանության քրեական հետախուզության գլխավոր վարչության (վարչության պետ, Ոստիկանության գնդապետ Սամվել Ասատրյանի), Ոստիկանության կազմակերպված հանցավորության դեմ պայքարի գլխավոր (6-րդ) վարչության պետի առաջին տեղակալ, Ոստիկանության գնդապետ Ալիկ Մարգարյանի գլխավորությամբ տաք հետքերով հայտնաբերել են հանցագործությունը կատարող կասկածյալին։ Նա Արարատի մարզի Նորաշեն գյուղի բնակիչ՝ 31-ամյա Գ. Հակոբյանն է, ով նախօրոք իմանալով, որ «Հայփոստ»-ի մեքենայով 6 պարկ գումար է տեղափոխվում գյուղեր, իր Ford մակնիշի ավտոմեքենայով հետևել է «Հայփոստ»-ի վարորդին ու արդեն Շահումյան գյուղի վարչական տարածքում օգտվելով դռան բաց լինելու հանգամանքից՝ գումարը հափշտակել է։ Նրան հայտնաբերել են Երևանում և տեղափոխել Ոստիկանության Արտաշատի բաժին։ Մնում է՝ Արարատի մարզի «մեծն» ոստիկանապետ Ս. Քոչարյանն ու Արտաշատի ոստիկանապետ, «մեծն» Ա. Հովհաննիսյանը իրականում զբաղվեն հանցագործույթան նախականխմամբ և հանցագործությունների բացահայտմամբ, այլ ոչ թե զբաղվեն քաղաքական ինտրիգներով, իսկ Ոստիկանության քրեական հետախուզության գլխավոր վարչության և 6-րդ գլխավոր վարչության կատարած աշխատանքները չվերագրեն իրենց։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: