Գեներալ Մաքմասթեր. Իրանի ցուցարարները վայելում են Վաշինգտոնի էմոցիոնալ աջակցությունն ու համակրանքը
Ամերիկայի Ձայն Իրանում իրավիճակը շարունակում է մնալ լարված՝ կապված վերջին օրերին այստեղ ընթացող զանգվածային բողոքի ցույցերի հետ: Միջազգային հանրությունն արձագանքում է Իրանում ընթացող զարգացումներին: Մարդու իրավունքների հարցով ՄԱԿ-ի գերագույն հանձնակատարի գրասենյակն իր մտահոգությունն է արտահայտել Իրանում բռնության ու մարդկային զոհերի կապակցությամբ՝ կոչ անելով Իրանի ղեկավարությանը միջոցներ ձեռնարկել լարվածությունը նվազեցնելու ուղղությամբ և խուսափել բռնության նոր ալիքից: Իր հերթին Եվրամիությունը ևս դատապարտել է բռնությունը՝ հայտարարելով, որ ուշադրությամբ հետևում է Իրանում ընթացող զարգացումներին: Եվրոպական հանձնաժողովի խոսնակ Մինա Անդրեևան ընդգծել է մարդկանց հիմնական ազատություների և իրավունքների պաշտպանության ապահովման անհրաժեշտությունն Իրանում: Միացյալ Նահանգները ևս արձագանքել է Իրանի իրավիճակին: Նախագահ Դոնալդ Թրամփն իր թվիթերյան նոր գրառման մեջ ընդգծել է ԱՄՆ-ի աջակցությունը Իրանի ժողովրդին, որը հակադրվում է, ըստ նախագահի, Իրանի կոռումպացված կառավարությանը: Նախագահ Թրամփի հետ մեկտեղ Իրանի իրավիճակի մասին անդրադարձել է նաև Սպիտակ տան ազգային անվտանգության հարցերով խորհրդական, գեներալ Հերբերտ Մաքմասթերի խոսքը, ով «Ամերիկայի Ձայն»-ին տված հարցազրույցում նշել է, որ Իրանի ժողովուրդն իր զայրույթն է արտահայտում, քանի որ երկրի իշխանությունները քաղաքացիների կարիքները հոգալու փոխարեն զբաղված են ահաբեկչության արտահանմամբ: Խոսելով ԱՄՆ-ի գործողությունների մասին՝ գեներալը ասել է. «Մենք կտեսնենք ինչ տարբերակներ ունենք, սակայն կարծում եմ, որ անհրաժեշտ է բարձրաձայնել ամբողջ աշխարհում Իրանի ժողովրդի անունից»,- նշել է Մաքմասթերը: Ազգային անվտանգության հարցերով խորհրդականն աջակցություն է հայտնել վարչակազմի վարած քաղաքականությանը՝ Իրանի նկատմամբ պատժամիջոցներ կիրառելու ուղղությամբ՝ ընդգծելով, որ դրանք զրկում են վարչակարգին համապատասխան ռեսուրսներից: Ըստ Մաքմասթերի, Իրանը շարունակում է դրսևորել ագրեսիվ վարքագիծ: Նրա խոսքերով, իրանցի ցուցարարները վայելում են ԱՄՆ-ի էմոցիոնալ աջակցությունն ու համակրանքը, և ԱՄՆ-ը ուրախ է, որ նրանք իրականացնում են, մեջբերում ենք, բռնակալ վարչակարգի դեմ բարձրաձայնելու իրենց իրավունքը։ Հիշեցնենք, որ Իրանի իշխանությունները երկրում ստեղծված կացության մեջ մեղադրել են ՝՝թշնամիներին՛՛, մասնավորապես՝ ԱՄՆ-ին, Մեծ Բրիտանիային և Սաուդյան Արաբիային:
Հետևեք մեզ Viber-ում
