Չէ՞ որ Բաքվում դատվող մեր հայրենակիցները կարող էին մասնակցել այս ընտրություններին, եղանակ փոխել երկրում, պայքար կազմակերպել․․․

Հրապարակ օրաթերթի գլխավոր խմբագիր Արմինե Օհանյանը գրում է․

Մենք, իհարկե, Բաքվի «արդարադատությունից» չնչին ակնկալիք չունեինք եւ այս դատավճիռները կանխատեսելի էին, պատժաչափերն էլ էական չեն, որովհետեւ ակնհայտ է՝ դատվում են հայրենիքին, Արցախին ծառայություններ մատուցած անմեղ մարդիկ, դատվում է ողջ հայ ժողովուրդը, սա դատավճիռ է ընդդեմ Հայաստանի Հանրապետության եւ միայն չհայը կարող է հաշտ լինել դրա հետ, ընդունելի համարել։ Բայց այս ամենի մեջ այլ բան է սարսափեցնում։
Իբրեւ թե խաղաղություն կառուցող Իլհամ Ալիեւն ու Նիկոլ Փաշինյանը ձեւացնում են, թե այս դատերը կապ չունեն խաղաղության գործընթացի հետ, սա խաղաղությունից անդին՝ բոլորովին այլ բան է։ Այն, որ հայատյաց Ալիեւը ձեւացնում է ու ամեն ինչ անում է, որ տարանջատի Հայաստանի հետ հարաբերությունները գերիների նկատմամբ դատավարությունից, միանգամայն հասկանալի է՝ իր շահերից է բխում։ Իսկ ինչո՞ւ է նման կերպ պահում իրեն, ոչ բարով՝ Հայաստանի ղեկավար կոչվածը։
Ինչո՞ւ է դատավճիռների արձակման նախորդ օրը գնում Աբու Դաբի՝ հրճվալից դեմքով կանգնում հայասպան Ալիեւի կողքին, բռնում նրա ձեռքը, ինչ որ մրցանակ ստանում, որը երկու «արյունակից եղբայր» համատեղ են ստանում։ Փաստորեն, այնքան մեծ արհամարհանք կա իր հանդեպ, որ Բաքվի դատարանը հենց հաջորդ օրը նման դատավճիռներ է արձակում՝ ստորացնելով ողջ հայ ազգին եւ նրա ղեկավար կոչվող անինքնասերին։
Իսկ կարո՞ղ ենք ենթադրել, որ այս դատավճիռները համաձայնեցված են եղել իր հետ։ Կարո՞ղ ենք ասել, որ Ալիեւի ձեռքը բռնողը, շնորհակալություն հայտնողը (հայտնողները) այս դատավճիռների եւ մեր հայազգի գործիչների խոշտանգումներին հավասարապես մասնակից են ու ամեն կերպ աջակցում են նրան, որ հայերին դատի ու պահի Բաքվում։
Իսկ կարո՞ղ ենք ենթադրել, որ սա արվում է նաեւ նրա համար, որ Նիկոլ Փաշինյանն ու ՔՊ-ն վերարտադրվեն եւ նրան իշխանությունից հեռացնելու ռեալ շանսեր ունեցողների քանակը նվազ լինի այս փուլում երկրում, չէ՞ որ Բաքվում դատվող մեր հայրենակիցները կարող էին մասնակցել այս ընտրություններին, եղանակ փոխել երկրում, պայքար կազմակերպել․․․
Իսկ կարո՞ղ ենք ենթադրել, որ Հայաստանի ղեկին նստած մարդիկ ոչ միայն այս՝ հայազգի գործիչներին բանտում պահելու, խոշտանգելու եւ ցմահ դատելու հարցում են համագործակցում մեր թշնամու հետ, այլ նաեւ շատ ուրիշ հարցերում․․․